Qaanaami piniartut nunap killeqarfianik nakkutilliiumapput
Qaanaami piniartut KNAPK-p siulittaasuanik Leif Fontainemik ataatsimeeqatereerlutik inuussutissarsiutinik allanik nutaanik periarfissat saqqummiuppaat. Silap pissusaata allanngoriartorneratigut piniartut allanik inuussutissarsiutinik ingerlatsisariaqalernerat pissutigalugu ikiorsiisarnermut aningaasaateqarfimmik pilersitsisoqarnissaa pisariaqartinnerarlugu Leif Fontaine allappoq.
Piniartut namminneerlutik allanik inuussutissarsiuteqarsinnaanerminnik siunnersuuteqarnerminni siunnersuutigaat, nunatta avannaarsuani killeqarfinnik nakkutilliineq isumagisinnnaagaat, pingaartumik sikuunerani qimussimik angallaviit killeqarfiillu piniartut isumagisinnaagaat siunnersuutigineqarluni.
Takornarianik umimmanniartitsisinnaaneq nannunniartitsinnaanerlu piniartut inuussutissarsiutitut siunnersuutigaat. Qaanaap eqqaani aalisarnermik sukumiisumik misilittaasoqarnissaa misissuisoqarnissaalu, aalisarnermut ikaarsaariarnissaq piviusunngortinniarlugu siunnersuutigineqarpoq.
Arctic Green Food-ip Qaanaami tunitsiviata namminersortunngortinneqarnissaa siunnersuutigineqarpoq. Qaanaami piniartut allanik nutaanik inuussutissarsiutinik kissaateqarlutik allagaqarnerat aallavigalugu piniartut kisaatigaat Aalisarnermut Piniarnermut Nunalerinermullu Naalakkersuisoq Ane Hansen avanersuarmut tikeraasssasoq.
