Avatangiisit

Qaammataasap nutaap silamik ilimasaarusiortarneq pitsaanerulersissavaa

Rakettip avataarsualiartaatip, Sentinel 3-p, Moskvamit kilometerinik 800-nik ungasitsigisumit marlunngormat aallartinneqartup aallartitsissutaata sinnikui Baffinbugtimut marlunngormat ualikkut nakkarput. Raketti qaammataasamik nassartoq uuttortaatinik pingaarutilinnik Danmarkip Silasiorfiata DMI-p Issittumi silamik ilimasaarusiortarneranut pitsanngorsaataasussanik imaqarpoq.

Allattoq Karsten Sommer

februaarip 18-at 2016 07:14

Nutserisoq Simon Uldum -

Rakettimik aallartitsinermut atatillugu DMI-p pingaarutilimmik suleqataanera Ekstrabladetip allaaseraa. Qaammataasaq nunarsuaq kaaviiaalerpagu uuttortaataasa ilaat danskit ilisimatuuinit misilittarneqarlutillu nakkutigineqassapput.

Sermimik ilisimatuup Gorm Dybkjærip DMI-meersup tamanna ima nassuiaateqarfigaa:

- Atortorissaarutit ilaat Sermersuarmi Atlantikullu avannaata imaani kiassutsimik uuttortaatip paasissutissanik nassitsississutaata nassiussai misilerassavagut. Tamannalu ilaatigut umiarsuarmit nakkutilliissummit pissaaq, taannalu Danmarkip Kalaallit Nunaata akornanni piffissami aggersumi angalalissaaq, Gorm Dybkjær Ekstrabladetimut taama oqarpoq.

Aamma atuaruk ASSIT Rakettip sinnikuisa Baffinbugtimut nakkarnerat

Sentinel 3 uuttortaaterpassuarnik atortulersugaavoq, taakkulu atorlugit ilisimatuut silap pissusiata allanngoriartornera paasisaqarfigineruniarsarissavaat. Tamannalu Sermersuarmi Atlantikullu avannaata imaata qaavata kiassusaanik uuttortaasarnikkut pissaaq.

Misileraanerit qaammatini aggersuni naammassineqartussatut naatsorsuutigineqarput, tamatumalu kingorna paasissutissat Sentinel 3-meersut ilisimatuunit atorneqarsinnaalissallutik.

DMI-p Issittumi silamik ilimasaarutaata siunissami pitsaanerulernissaanik tamanna kinguneqassasoq, Gorm Dybkjær Ekstrabladetimut taama neriorsuuteqarpoq.

Aamma atuaruk Russit rakettiannit seqummakut Qaanaap avataatungaani nakkarsinnaapput