Qaammat Titanicip umiuneranut pisooqataavoq

Titanic ukiut hunnorujut matuma siornagut apriilimi umiunera, atuakkiortut filmiliortartullu sammisarilluarpaat. Ilisimatusartulli tamatumunnga tunuarsimaarsimanngillat.

Texas State Universitymimi ilisimatusartut amerikamiut atuagassiaannut Sky and Telescopemut allaaserisaanni Titanicip umiuneranut aallaaviusut paasisat kingulliit suuneri atuarneqarsinnaapput.

- Titanic umiunngilaarnermini, sukkassusissani tamakkerlugu sukkatigaluni ilulissat akornannut pulasimavoq, tassalu ilulissamut aporami umiulluni. Taamanili Titanic siullerpaamik angalaleruttortoq, qaammatip nalinginnaanngitsumik  inissisimanerata imaq iluliarpassuaqalersissimagaa pasitsaanneqarpoq. Fysikimik ilisimatusartoq Donald Olson aviisimut San Marcos Mercurymut oqaluttuarpoq.

- Taamanimi qaammatip nunarsuarput ukiuni 1400-ni aatsaat taama qanitsigalugu kaavippaa, tassalu nunarsuatsinni ulittarneq tinittarnerlu sakkortunerulersissimaqalugu, Olsonilli avataannarsuani pissutsit allat aamma taputartuuppai, 1912-imilu ukiuunerani pissutsit immikkuullarissimaneri oqaatigalugit.

Iluliarpassuimmi nunatsinneersut, apriiliuinnaleraa taama kujasitsigisumut pisimassappata pissutsit immikkuullarissimanissaat avaqqukkuminaappoq, amerikamiut ilisimatusartui taama naqissusiipput.

Pissutsimmi nalinginnaagaangata iluliarsuit avannarpasinnerusumi Paggivittap New Foundlandilluunniit sineriaani ikkarlittarput nikeriarsinnaajunnaartarlutillu. Taamanili ulerujussuartarneratigut iluliarsuit suliluunniit aanngikkaluarlutik imaaliallaannaq kaanngartarput, kujasinnerusumullu pisinnaalermata, Titanicip umiuneranik kinguneqarput.

- Tassa iluliarsuup aporneqannginnerani sumerpiamiissimanersoq oqaatigisinnaanngikkaluarlutigu qanoq pisoqarsimasinnaanera ilisimatuussutsikkut illersorneqarsinnaasumik maanna nassuiaatissaqartilerparput, fysikimik ilisimatusartoq Donald Olson taama naggasiivoq.

Apriilip 14-ani Titanicip umiuneraniit ukiut hornorujut qaangiutissapput.