Putinip unammillertaa Navalnyj issittumi pillakkat nunaanniitinneqartoq
Ruslandimi naalakkersuisunut isornartorsiuisartoq maannalu parnaarussaasoq, Aleksej Navalnyj, Ruslandip avannaatungaani pillakkat nunaanniitinneqartoq, Navalnyjp oqaaseqartartua, Kira Jarmysj inuit attaveqaqigiittarfiatigut X-kkut taama allaaserisaqarpoq.
Oqaaseqartartup ilanngullugu oqaatigaa, Navalnyjip eqqartuussissuserisua ataasinngornermi alakkaassimasoq. Sapaatit akunneri arlallit kingulliit Aleksej Navalnyjip sumiinnera nalornissutaasarsimavoq.
Navalnyj Ruslandimi præsidentimut Vladimir Putinimut politikikkut unammillertaanerpaatut isigineqartarmat, USAp arfininngornermi nalunaarutigaa tamanna ernumanartoqartoq.
- Erngertumik iperagaanissaa inassutigaarput, sumulluunniit pituttorsimanani qinersisinnaatitaanermik naqisimanninneq unitsinneqartariaqarpoq, USAp nunanut allanut ministeria, Antony Blinken, inuit attaveqatigiittarfiani X-mi taama allaaserisaqarpoq.
Navalnyjip Ruslandimi 2018-imi præsidentimut qinersisoqartussanngormat sassarniarluni pisortatigoortumik nalunaarutigaa, politikikkullu peqquserlunniartutut eqqartuunneqarsimammat sassaqqusaasimanngilaq.
Navalnyj 2020-mi toqunartutortillugu toqqutigingajakkaminik toqoriaraluarneqarpoq. Putinimullu aqutsisut toqutseriaraluarsimasutut, Navalnyjip taamanili pasillerpai.
Navalnyji qaammatit arlallit tyskit napparsimmavianni katsorsartereerluni Mosvamut angerlarpoq, piffissarlu sivisunngitsoq qaangiummat parnaarussaalluni.
