Putin: Ukrainemut missilinik saassussivugut

Russit Ukrainemi nukissiorfinnik attaveqaqatigiinnermullu qitiusoqarfinnik qaartartut missilit atorlugit ullaassaq saassussisimasut, russit præsidentiata Vladimir Putinip ullumi oqalugiarnermini oqaatigaa.

Putinip Ukrainemiut "peqqarniisaarneri" sakkortuumik akisimanerarpai. Taassumalu allanik "peqqarniisaartoqassappat" sakkortuumik akissuteqassallutik aarlerisaarutigaa.

- Ruslandip Ukrainemi nukissiorfiit attaveqaqatigiinnermullu qitiusoqarfiit ullaaq missilinik saassussiffigai, Putin tv-kkut aallakaatitami oqarpoq.

Ukrainemi meeqqat silami pinnguartarfii, inuillu aqqusinerni pisuttut missilinik ungasissumut igeriuttakkanik eqqugaasimasut Ukrainemi tv-kkut aallakaatitatigut takutinneqarput.

AAMMA ATUARUK Putin atomimik nukiliorfimmik tiguaaqqusisoq

- Russit oqartussaaffigisaannut Ukrainemiut saassussimmata sakkortuumik akisassavagut, uagutsinnut siorasaarinerattulli sakkortutigisumik, Putin oqarpoq.

Putip Ukrainemiut sakkutuuini immikkut sungiusakkat Krimip qeqertaasartaani ikaartarfimmik sapaatit akunnerata naanerani qaartitsinermut pisuutippai.

- Ukrainemiut sakkutuuinik isumaliutigineqarlunilu suliassiissutaavoq, Putin russit naalakkersuisuinit videomi saqqummersitami oqarpoq.

- Ruslandimut saassussisoqaannarpat qisuariaatit sakkortussapput.

Russit ullaassaq Kieffimut illoqarfinnullu allanut saassussinerat nunanit killernit akuersaarneqanngilaq.

Missilinik Kyivimut eqquinerit saniatigut illoqarfiit Lviv, i Ternopil, Zjytomyr aamma Dnipro eqqugaapput.

Russit ullaassaq qaartartunik 75-inik igeriussisimasut, taakkunanngalu 41-t suli silaannarmiitillugit Ukrainep sakkutuuinit eqqorneqarsimasut, Ukrainemiut præsidentiata Volomir Zelenskijip oqaatigaa.

/ritzau/Reuters