Pujortarusuttut inatsit aporfiginngilaat

Inuusuttuaqqat pujortartarnerat allannguuteqangaarsimanngitsoq atuartut akornanni peqqissutsimik 2010-mi misissuinerup, HBSC-imik taaguuteqartup takutippaa.

Inuusuttuaqqallu 18-it inorlugit ukiullit ajornanngitsumik tupanik pissarsisinnaasut Ilulissani 15-inik ukiulinnik apersuinitsinni paasivarput, taakkualu isumaqarput inersimasut meeqqanut tupa pillugu oqaaqqissaarinerusinnaasut.

- Ilaanni pisissutsiffissaarunnartarpoq ilaanni ingerlaannaq pisissutsittarpugut, ajornanngittuaraavoq.

- Uanga pujortartarallarama anaanannut qinusarpunga, arlaannut pisissutsinnianngikkaangama.

Niviaaluit pingasut 15-inik ukiullit silami pujortaqataasut tupamik pissarsisinnaanerup ajornannginnera pillugu taama oqarput.

Taakku ilaat pujortartarnertik pillugu angajoqqaaminnut isertormata aqqi ilisaritissanngilagut.

Pisiniarfiit 18-ileereersimasunuinnaq tupanik nioqquteqarsinnaapput, niviaaluilli apersukkagut tupanik kaasarfimmioqarput pisissutsittarlutillu.

- Uanga siullermik allat ilangisarallarakkit, taava pisissussiffissarsiortarnikuuvugut, soorlu Sparip eqqaani allaniluunniit. Ilaquttannit arlaanniilluunniit maannakkut pisissutsittarpunga, niviarsiaraq oqarpoq.

Atuartut akornanni 2010-mi peqqissutsimik misissuinerup HBSC-imik taaguuteqartup takutippaa, inuusuttut 15-inik ukiullit 52 procentii ullut tamaasa pujortartartuusut. Tamannalu misissuinermut kingullermut 2006-imi pisumut sanilliullugu ilassuteqalaarpoq.

Inuusuttuaqqat pujortartartut apersukkagut isumaqanngillat pujortartarneq mutiusoq, peqqinnanngitsuusorlu aamma ilisimavaat. Pujortartarnerli akuersaarneqarpallaarsoraat, soorlu angajoqqaat meeqqanut oqaaqqissaarisarnerat killeqarnerarlugu.

- Ilai akuerineqanngeqqaartarput, pujortartuuginnartillunili akuersisarput, niviarsiaraq 15-inik ukiulik oqarpoq.

Inuusuttuaqqallu pujortartalernissaat pinaveersaartinneqassappat, angajoqqaat iliuuseqartunut ilaasariaqarput.

- Angajoqqaat isumalluutaanatik. Immaqa nammineq akissaqaleraanni aatsaat pujortartoqalertoqarsinnaavoq imaluunniit pujortartariaqanngikkaluarluni. Angajoqqaat pujortartarunik tupa toqqorsimanerunerutittariaqarpaat, nerriviup qaavaniitsinnagit, illullu iluani pujortartaratik.

Paarisamit pujortarunnaarnissaq pillugu suliniutissat, meeqqaanut, inuusuttunut inersimasunullu saaffiginnittut maanna aaqqissuunneqaleruttorput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat