Pujortartarneq Islandimi inerteqqutaaleratarsinnaavoq

Siunnersuut taanna Altingimi ukiaru oqallisigineqassaaq, tassa tupat suulluunniit allagartalersorlugit siunissami pisiarineqartalissasut, tupaguttullu nakorsaataarniarfinni taamaallaat pisiarisinnaassagaat. Tuluit Nunaanni aviisi, The Guardian, taama allaaserisaqarpoq.

Siunnersuut naapertorlugu 20-leereersimasut allagartamik peqqaaratik nakorsaataarniarfinni aallaqqaammut cigarettisisinnaagallassapput. Pujortartartulli kingusinnerukkut nakorsamit allagartamik peqqaarlutik cigarettisisinnaalissapput.

Suliniut malunnaatilik taanna ukiunut qulinut tulliuttunut pilersaarummut ilaavoq, Islandimi pisortat suliffeqarfiini tamani, aqqusinerni allanilu ukiut qulit ingerlaneranni pujortartarnerup inerteqqutaalernissaa siunertaalluni.

Peqqinnissamut ministeriusimasoq, Siv Fridleifsdottir, siunnersuutip suliarinerani peqataasimavoq.

- Meeqqat inuusuttullu pujortartalinnginnissaat siunertaavoq, Siv Fridleifsdottir aviisimut The Guardianimut oqarpoq.

Islandimi pujortartartut ukiut 20-t kingulliit affaannanngorsimapput. Islandimiut 15 procentii taamaallaat qaqutiguinnaaq cigarettimik ikitsisarput. Taamaalilluni Island Europami nunani pujortartukinnersaavoq.