Pujortarneq ajornakusoornerulissaaq
Inatsisartut tamarmiullutik upernaakkut ataatsimiilerunik pujortarneq pillugu inatsit nutaaq akuersissutigissagunarpaat, ataatsimut isigalugu pujortartartut silaannarimmi pujortartalernissaannut pinngitsaalineqassallutik. Pujortartartut inip iluani pujortartarfiat kingulleq - maannakkuugallartoq - tassaassaaq angerlarsimaffik.
Inatsisissatut siunnersuut naatsunik oqaasertaqarpoq erseqqilluinnarlunili. Pisortammi suliffeqarfiutaanni pisortallu ingerlatseqatigiiffiini piginneqataallutillu ingerlatseqatigiiffiini pujortarneq inerteqqutaalluinnalissaaq. Inatsimmi aamma suliffeqarfiit namminersortunit pigineqartut qulit sinnerlugit sulisoqartut tamarmik ilaatinneqarput.
Ilinniartitsivinni meeqqerivinnilu tamani pujortartarneq unitsinneqassaaq. Ulluunerani angerlarsimaffimminni meeqqanik paaqqinnittartut aammattaaq pujortaqqusaajunnaassapput. Tamanna aamma kollegiami najugalinnut atuutissaaq. Bussini, taxani, imerniartarfinni neriniartarfinnilu pujortarneq inerteqqutaalissaaq. Aammattaaq imaatigut angalallutit pujortarniaruit silamut anisariaqartassaatit, inatsimmilu nalinginnaanngitsorujussuarmik aammattaaq peqatigiiffinni namminersortuni klubbinilu pujortarneq inerteqqutaalissaaq.
Pujortartartut qimarnguissaat kingulleq tassaalissaaq angerlarsimaffik. Aamma tamanna utoqqaat illuanni atuuppoq. Utoqqaat pujortarsinnaapput iniminni kisimiillutik najugaqarunik, sulisulli najuunneranni sikaatugartik qamittassallugu.
Taamaakkaluartoq inuit peqqissuunissaanni tunngavik pisariitsunnguuvoq: Silamut anillutit pujortarit. Aamma sullissiveqarfinni arlalippassuarni inuit anillutik aatsaat pujortartalissapput. Isaarissani anisarfinnilu cigarettitornissaq inerteqqutaalissaaq. Suliffeqarfiit ataasiakkaat illuaqqamik pujortartarfinnguamik pilersitsissanerlutik namminneq aalajangertalissavaat, ajornartuuiffimmi pujortartartunut illersuutaasinnaasumik.
Soraarluni imerniartarfimmi ornigannaami pujortartarneq sutorniartarfimmilu nerereernermi kaffisornissamut cognacitugassamulluunniit sikaatornissaq unitsinneqassaaq. Tassani aamma tunngaviuvoq: Silamut anillutit pujortarit.
Imerniartarfiit sutorniartarfiillu taamaattoq immikkut pujortartarfinnik sanatitsisinnaapput. Tamatumanili aamma taamaallaat issittup silaata illersornissaa atuutissalluni. Sassaalliisoqaranilu aliikkusersuisoqassanngilaq. Tamakkuupput pujortartartut nalaatassaattut taaneqarsinnaasut ilaannanngui.
Inatsit apriilip 13-ianni siullermeerneqassasoq naatsorsuutigineqarpoq. Ullorlu 13-erimmagu pujortartartorpassuit ulloq taanna iluatsitsiviunngitsorujussuartut isigilissagunarlugu.
