Puisit amiinut immikkut aningaasaliinissaq inatsisitigut tunngavissaqanngilaq

Aningaasaqarnermut ataatsimiititaliami amerlanerussuteqartut, tassa Atassummit, Inuit Ataqatigiinnit Demokraatinillu qinnuteqaat isummerfigiumaneqanngilaq, qinersineq sioqqullugu Naalakkersuisuugallartunut aningaasaqarnermullu ataatsimiittaliaagallartumut atatillugu inatsisitigut tunngavissaqarnersoq apeqquserneqarmat.

Aningaasaqarnermut ataatsimiititaliap siulittaasua Augusta Salling ima nassuiaavoq:

- Qinersinissap nalunaarutigineqarnerata kingornagut, naalakkersuisunngortitsisoqarnissaata tungaanut, naalakkersuisuugallartut aamma aningaasaqarnermut ataatsimiititaliaagallartoq, taamaallat apeqqutini pingaaruteqartuni aalajangiisinnaapput. Taamaattumik apeqqut una pillugu misissuisitsivugut, aamma inatsisitigut toqqammavissat misissorpavut. Tassami apeqqutinik assingusunik qinersineq sioqqullugu saqqummertoqartarsinnaanera sillimaffigisariaqarmat. Taamaattumik ataatsimiititaliami amerlanerussuteqartut aalajangerpaat, politikimut tunngassuteqarmat, aningaasaqarnermut ataatsimiititaliap isummerfigisinnaanngikkaa, taamaammallu naalakkersuisunut utertinneqarpoq, qinnuteqaatigalugu suliassanngorteqqinneqarsinnaammat, Augusta Salling oqarpoq.

- Puisit amiisa juunip aallaqqaataanit tunisaaqqilersussaanerat aalajangiinermut pissutaaqataanersoq apeqqutigineqarmat, Augusta Salling oqarpoq, tamanna patsisaanngitsoq, inatsisitigulli tunngavissat kisimik isiginiarneqarsimasut.