Puisit amii Nunatsinneersut Coopimi nioqqutigineqalersut
Coopimi paasissutissiinermut pisortap Jens Juul Nielsenip KNR-imut oqaatigaa Coop siullerpaamik puisit amiinik nioqquteqalersoq, tamannalu puisit amiisa Great Greenlandimeersut EU-mit apriilip qaammataani akuerineqarnerisa kingorna Coopip politikkerisaanut naapertuuttunngornerannik peqquteqartoq.
- Akuersisarnermut aaqqissuussisoqarneratigut uagut paasinninnerput malillugu akisussaassuseqartumik nioqqutaavoq, aammalu atuisartunut taamaasilluni nittarsaakkuminarnerulersinneqarluni.
Puisit amiinik qanoq amerlatigisunik pisisoqarsimanersoq Coopip oqaatigiumanngilaa. Toqqortaatigineqartulli ikitsuinnanngoreersimasut oqaatigineqarpoq.
- Soqutigineqartupilussuupput, taamaammat kingusinnerusukkut taamatut neqerooruteqaqqissajunnarsivugut, Jens Juul Nielsen oqarpoq.
WWF-ip Danmarkimi immikkoortortaqarfiata Kalaallit Nunaanni puisinniarneq pillugu nalunaarusiani ippassaq saqqummiuppaa, tassanilu puisinniarnerup piujuaannartitsinissamik tunngaveqarluni ingerlanneqarnera naqissuserneqarpoq.
- Puisip amia nioqqutaavoq, assersuutigalugu annoraaminernik atisalianut naleqqiullugu pedicidet atornagit suliarineqartartoq, nunarsuarmimi atisaliornerup annersaani pesticidet atorneqartarput, taakkulu nunap iluata ernganik mingutsitsisarlutik, generalsekretær Gitte Seeberg Berlingske Tidendemi ullumi saqqummersumi ilaatigut taama allappoq.
