Puisinniarneq pillugu Canadami lagkaaginik sorsuunneq ingerlaqqippoq
Maannali oqaluttuaq mumittutut oqaatigineqarsinnaavoq. Illoqarfimmi St. John's-imi Paggivittamiittumi, PETA-mut ilaasortat ilaata, puisitut isikkulimmik atisalersorsimalluni, ministeriunerup Harperip oqalugiarnissaa utaqqivaa, saamigullu allagartarsualisaarluni ima allassimasumik: "Harper, puisinik toqoraajunnaarniarit".
Canadamiut tv-qarfiannit CTV-mit oqaluttuarineqarpoq, taamaaleruttortoq angut qimmitut isikkulimmik atisalersorsimasoq, puisinniallu atortagaannik sungaartumik sialussiutilik, arpannaq takkussimasoq, uumasunillu illersuiniaqatigiiffimmeersoq, puisiusaartoq taanna, orneriarlugu puisitut niaqorisuusaagaa illuarteriarlugu, niaquagut lagkaagimik flødeskumitaqaqisumik milorsimavaa.
Arnaq puisiusaartoq Emily Lavender tusagassiuutinut oqarpoq, nammineq oqarneratut, nunarsuatsinni toqoraaneq aattaqarnerpaaq, Canadami naalakkersuisut unitsittariaqaleraat...inuilli allat pisumut isiginnittuusut oqarput, arnaq taanna angerlaannaruni pitsaanerusoq, taakkulu ilaat tusagassiorfinnut ima oqarpoq: "puisit taama inequnartiginatillu piuminartiginngikkaluarpata, pisarineqartarnerat kikkut tamarmik soqutiginavianngikkaluaraat."
Puisinniarneq Paggivittami aningaasarsiornermut pingaarutilerujussuuvoq, tamaanilu uumasunik illersuiniaqatigiit tikilluaqqusaanngillat.
Gerry Byrne, Paggivittamit inatsisartunut ilaasortaasoq, aalisarnermut ministerip lagkaagimik milorneqarnerata kingornagut, raadiukkut aallakaatitami oqarpoq, PETA peqqarniisaarniatut unnerluutigineqartariaqaraluartoq, tassami anguniakkatik anguniarlugit nakuusernermik ingerlatsimmata; tamatumunnga PETA-meersut akillutik oqarput, sianiitsut kisimik lagkaagi qaartartorlu immikkoortissinnaanngikkaat.