Puisi pillugu suliaq taamaatiinnarneqariaannaavoq
- Aap, tamanna ilimanaateqarsinnaavoq, nalunaarusiaq takkunniariarpat aalajangerumaarpugut. Apeqqutinut akissuteqaatit piumasavut paasisimalerpavut, tassanngaanniillu qanoq pisoqassanersoq aalajangerumaarpugut. Nunatta Eqqartuussiviani februaarimi pinngitsuutitsineq ingerlateqqinneqarsinnaanersoq nalunarluinnartoq Nunatta Eqqartuussiviani ippassaq saqqummiunneqarmat, Namminersorlutik Oqartussani inatsiseqarnermut pisortaq, Johan E. Simonsen, taama oqarpoq.
Maannakkut inatsisit atuuttut 2010-mi atuutilersut piunngikkallarmatali Puisi pillugu suliassaq aallartinnikuuvoq taamaattumillu nalaagaaffimmi eqqartuussiviit qullersaata aalajangertussaava ilumut Østre Landsret suliamik ingerlatitseqqissanersoq.
Tamatuma saniatigut Nunatta Eqqartuussisuata suliaq pillugu nalunaarusiaa piareeqqariissaaq. Taassuma tassani itisilissava, Namminersorlutik Oqartussat suliffeqarfillu akiliisinnaajunnaartoq sinnerlugit 22 millionit koruuninik akileeqqusissummut sooq suliffeqarfiup siulersuisuini ilaasortat, aqutsisut imaluunniit kukkunersiuisut koruuninnguamilluunniit akiliuteqassannginnersut.
Suliaq ingerlateqqinneqassagaluarpat ingerlateqqinneqassanngikkaluarpalluunniit taava Nunatta Eqqartuussisuata nassuiaataa, Namminersorlutik Oqartussanut suliamut tunngatillugu taamaatitsineq periarfissaavoq. Pinngitsuutinneqarsimasunut arlaqartunut ingerlatitseqqinnginnissaq aamma Namminersorlutik Oqartussanut periarfissaavoq.
- Taamaalluarsinnaavoq, inuk imaluunniit inuit taakku ajortuliortutut isiginngikkutsigik allatut iliorsinnaanngilagut kisianni suliaq taamaatiinnarlugu. Namminersorlutik Oqartussat inatsiseqrnermut pisortaat, Johan E. Simonsen oqarpoq.
Nunatta Eqqartuussisuata nalunaarusiani aggustip qiteqqunnerani naammassissallugu naatsorsuutigaa.
