Puisi pillugu suliaq taamaatiinnarneqariaannaavoq

Puisi pillugu suliassanngortitat eqqartuussissuserisuat Nicholas Symes KNR-imut ima oqarpoq:

- Suliaq taamaatiinnarniarunikku taamaatiinnasssavaat. Tamanna tamatsinnit tikilluaqqunassaqaaq. Anguniagarpummi taava angussavarput.

Puisi pillugu suliap taamaatiinnarneqariaannaanera, Namminersorlutik Oqartussani Inatsiseqarnermut pisortap, Jóhan E. Simonsenip qanittukkut oqaatigaa.

- Aap, tamanna ilimanaateqarpoq, nalunaarusiaq takkunniariarpat aalajangerumaarpugut. Apeqqutinut akissuteqaatit piumasavut paasisimalerpavut, tassanngaanniillu qanoq pisoqassanersoq aalajangerumaarpugut. Nunatta Eqqartuussiviani februaarimi pinngitsuutitsineq ingerlateqqinneqassanersoq nalunarluinnartoq Nunatta Eqqartuussiviani ukioq manna juulip arfernanni saqqummiunneqarmat, Jóhan E. Simonsen kingorna oqarpoq.

Tamatuma ilutigisaanik Puisi A/S-mik suliap Østre Landsrettimi suliareqqitassanngortinneqarnissaa, suliassanngortinneqartut eqqartuussissuserisuisa pinngitsoortinniarlugu sulipput, Namminersorlutik Oqartussat pinngitsuutitsinermut naggataatigut akuersaaginnaarsinnaanerat apeqqutaatinnagu.

Suliaq Østre Landsrettimi ilumut suliareqqinnisassanersoq nalilersussallugu Eqqartuussiviit qullersaat, Højesteret, suliassat ingerlaqqissanerannik naliliisartunit akuerineqaqqammerpoq; apeqqulli akiuminaassinnaavoq, Puisi A/S pillugu suliaq aallartereertoq, eqqartuussiveqarneq pillugu inatsit nutaaq atuutilermat.

Tassalu eqqartuussissuserisut, Puisi A/S-muit attuumassuteqartut, suliaq maannangaaq unitsinniarsaraat. Sullitaat naammattumik utaqqereertut, pingitsuutitsineq aalajangiinerusoq eqqortoq kiisalu tunngaviusumik allannguisoqarnavianngitsoq, eqqartuussissuserisut isumaqarput:

- Siullermik suliaq siunissami tunngaviliisussatut isiginiassagaluaraanni immikkuullarippallaarpoq kisiartaavallaarlunilu. Aappassaanik piginneqatigiiffiup akiliisinnaajunnaarnerani eqqartuussivinnut suliassanngortitsinermiit maannamut piffissap ingerlanerani, siulersuisut akisussaassuseqarnerannut malittarisassaqalersimavoq, Nicholas Symes tunngavilersuivoq.

Siulersuisuni ilaasortat, Puisi pisortaqarfia kukkunersiuisullu Nunatta Eqqartuussiviani  sassartinneqaramik pinngitsuutinneqartut. Tamatumunnga tunngavilersuutaavoq, puisimit tunisassiornissaq taamani Namminersornerullutik Oqartussanit ineriartortinneqarluni, tapersersorneqarluni aamma siuarsarneqarmat. Taamaammat milionilikkaanik annaasaqarsinnaaneq Namminersornerullutik Oqartussanit ilisimaneqareersimassasoq, Nunatta Eqqartuussiviata naliliivoq.