Puisi pillugu suliaq inerniliiffiginiarneqalerpoq

Allaganngorlugit uppernarsaatit untritilikkaat, ilisimannittuut oqaasii minnerunngitsumillu unnerluutigisaasut nassuiaaneri inatsisilerinermi inatsisinut malittarisassanullu naleqqussarneqartussaapput.

- Piginneqatigiiffinnut inatsimmi siulersuisut, pisortaqarfiup kukkunersiuisullu akisussaaffii misissoqqissaarniarpavut. Tassangaaniillu uanga inernilerpara siulersuisut taarsiinissamut akisussaaffeqanngitsut. Taama oqarpoq eqqartuussissuserisoq Nicholas Symes, unnerluutigisanut sisamanut inatsisilerituutut illersuisuusoq.

Suliamut sapaatip akunnera ataaseq piffissaliunneqarsimavoq, Namminersorlutillu Oqartussat eqqartuussissuserisuata unnerluutigineqartut aningaasanik millionilikkaanik Namminersornerullutik Oqartussat qularnaveeqqusiitillugit taarsigassarsiniarsimasutut aamma Kinamut aningaasanik nuussisarsimanerminni akisussaaffimminnik sumiginnaasimasutut akisussaatinniarneqarput.

Eqqartuussissuserisoq Nicholas Symes isumaqarpoq eqqartuussivimmi saqqummiisoqarsimanngitsoq siulersuisuusimasunut aningaasatigut akisussaaffimmik tunngaviusussamik, naak unnerluutigineqartut arlallit nassuerutigigaluaraat siusinnerusukkut takusinnaasimasariaqaraluaritsik Puisimut suliaq qanoq neriunaateqanngitsigisoq.

- Eqqaamasariaqarpoq piginneqatigiiffimmut inatsimmi qaqutigut siulersuisut aningaasanut annaasanut akisussaatinneqartarmata. Taamaattumik oqartoqarsinnaavoq Namminersorlutik Oqartussat eqqartuussissuserisuata tamanna uppernarsartariaqaraa, ullorlu manna tikillugu tusarsimasagut aallaavigalugit tamanna ajornakusuussaqaaq, Nicholas Symes oqarpoq.

Namminersorlutik Oqartussat eqqartuussissuserisuat Jesper Müller - eqqartuussut tusartinnagu suliaq pillugu oqaaseqarusunngilaq.