Puisi pillugu suliap ingerlaqqinnissaa suli akuerineqanngilaq
Nunatsinni eqqartuussisuunerup Søren Søndergaard Hansen-ip oqarnera naapertorlugu suliap suliarineqarnissaa Østre Landsrettip Danmarkimiittup akuerisimavaa taamaattorli nunatsinni eqqartuussiviup apeqqut aalajangiiffigeqqittussaallugu.
- Østre Landsrettimi suliarineqarsinnaanersoq eqqartuussiviit qullersaata isummerfigeqqaassavaa, Søren Søndergaard Hansen nassuiaavoq.
Puisi A/S 2000-imi akiliisinnaajunnaarpoq eqqartuussivimmilu suliarineqarnera sivitsuutillartorlu siulersuisuni ilaasortaasimasut tamarmik, naatsorsuuserisuusimasut pisortaasimasorlu nunatta eqqartuussiviani ukioq februaarimi pinngitsuutinneqarput.
Suliffeqarfiup akiliisinnaajunnaartup politikkikkut annertuumik tapersersorneqarnera nunatta eqqartuussisuunerata Søren Søndergaard Hansen-ip eqqartuussinermini pingaarnerutippaa; Namminersorlutik Oqartussat eqqartuussissut naappallaarnerarpaat suliallu marlunnut avinneqarsinnaasup marlunngortillugu isummerfigineqannginnera naammanginartinnagu.
Taamaammat suliaq ingerlateqqinneqassasoq februaari naalersoq nunatsinni qullersaasut aalajangerput. Inatsilli - Puisi A/S pillugu suliaq aallartinneqareersoq - 2010-mi allanngortinneqarmat suliaq qulliunerusumi suliareqqinneqassanersoq nalunarallarpoq.
- Eqqartuusseriaaseq siornatigut atuuttoq atorunnaarneqarpoq. Tassani Østre Landsrettimut ingerlatitseqqittoqarsinnaasoq aalajangersaqarpoq. Eqqartuusseriaatsimi maanna atorneqartumi Østre Landsret ingerlatitseqqiffissatut ilaanngilaq ingerlatitseqqissinnaanermullu malittarisassaqarnani. Erseqqissunilli malittarisassaqannginnera tassa ajornartorsiutaavoq, Søren Søndergaard Hansen KNR-imut oqarpoq.
Naak nalorninartoqaraluartoq eqqartuussaasimasut Puisi A/S pillugu akisussaatinneqarnissaat Namminersorlutik Oqartussat anguniarumaaraat eqqartuussisuuneq isumaqarpoq. Paasissutissanulli ilassutissat suliassanngortitseqqinnermi atorneqartussat aggustip qiteqqunnerani pissarsiariumaarlugit Søren Søndergaard Hansen-ip naatsorsuutigaa.
Qallunaat Nunaanni eqqartuussiveqarfimmi suliaqartussaasut oqaaseqartissinnaasimanngilagut.