"Puisi"-mi siulersuisut suliassartik suliarisimanngilaat
Suliassaat tassaavoq suliffeqarfimmik aningaasarsiorsinnaasumik pilersitsinissartik. Siulersuisullu suliassavimminnit akisussaasutut misiginerat taanna allamut saatsitsisimavoq.
Namminersorlutik Oqartussat eqqartuussissuserisuat ualeq manna Puisi A/S pillugu suliap naggaserneqarnerata aallartinneqarnerani taama nassuiaavoq. Eqqartuussisuserisut akerleriit eqqartuunneqartut nassuiaataat uppernarsaasullu nassuiaataat aallaavigalugit naggasiillutik saqqummiussissapput.
Aningaasat 12 millioni koruunit qularnaveeqqutitut atorneqartut annaaneqarsimanerannut eqqartuunneqartut nassuiaataat atorsinnaanngitsutut nalilerlugu Namminersorlutik Oqartussat eqqartuussissuserisuat aallartippoq. Aningaasat atorfissaqartinneqartut annertunerusimapput tamannalu nalunngikkaluarlugu nipangiussimaneqarsimalluni, Namminersorlutik Oqartussat eqqartuussissuserisuat oqarpoq.
Aningaasat atorfissaqartitanit annikinnernik atorniarnerup assigiinnarpaa aningaasaateqarfik imaqanngitsillugu nioqqutissanillu suli peqanngitsilluni, umiarsuarmik tikiffissamut naammattumik orsussaqanngivilluni aallarneq, Namminersorlutik Oqartussat eqqartuussissuserisuat, Jesper Müller, taama nassuiaavoq.
Allatut oqaatigalugu: Aningaasat 12 millioni koruunit naammanngitsut nalunngiivillugu aammalu sianiginngiivillugu aningaasanik allanik, tunisassiorneq aningaasanik isertitsisimassanngippat, allamit pissarsisoqarsinnaassanersoq, Puisi A/S-ip qularnaveeqquseeqqusiisimanera tuaviupiluussaasoq.
Eqqartuunneqartut maannamut taarseeqqusineq illuatungilertarsimavaat oqarlutik Namminersornerullutik Oqartussat qularnaveeqqusiinermi nalorninartut suuneri taamani nalusimanngikkaat. Qularnaveeqqusiisoqarnerata kingorna qaammatit arlaqanngitsut qaangiummata Puisi A/S akiliisinnaajunnaarluni nalunaarpoq.
Namminersorlutik Oqartussat eqqartuussissuserisuata oqarnera naapertorlugu taama nassuiaaneq eqqartuussivimmi atorneqarsinnaanngilaq.
Qanorluunniimmi Namminersornerullutik Oqartussat nalunngereeraluarunikku aningaasat naammanngitsut, Puisi A/S-ip tamanna naammattumik erseqqissarsimanngilaa. Qularnaveeqqummi taanna qinnutigineqartussaasimanngilluinnaraluarpoq.
Eqqartuunneqartullu eqqartuussissuserisuat Namminersorlutik Oqartussat eqqartuussissuserisuata nassuiaataanut tallimanngorpat akisinnaassaaq, tassanimi nammineq nassuiaalluni saqqummiussissammat.
