Puigortunngortut Puigortunngortut kommunit ilaannit suli piareersimaffigineqanngillat

- Inissaqarniarnikkut puigortunngortut ineqarfiannut qinnuteqartut amerliartorneratigut taanna malunnarpoq,

Qeqqata Kommuniani ilaqutariinnermut isumaginninnermullu ataatsimiititaliami siulittaasoq, Hans Frederik Olsen, Siumumeersoq, taama oqarpoq.

Utoqqaat amerliartortillugit puigortunngortut siunissami amerliartussasut National Videnscenter for Demensip, tassa naalagaaffiup puigortunngorneq pillugu ilisimasanik katersuiviata kisitsisaataasa takutippaat.

Amerliartornerallu kommuninut aningaasaqarnikkut pinngitsoorani sunniuteqartussaavoq.

Kommune Qeqertalinngortussamilu utoqqaat illuannik aappaaagumiit allilerinissamik sanaartornissamullu pilersaarusiulereersimapput.

Aasianniinnaanngitsorli, aamma Kommune Qeqertalimmi nunaqarfiit illoqarfiillu ilaat utoqqaat illussaanik sanaartortoqassasoq, borgmesterinngortussap oqaatigaa.

- Takusinnaagatsigu puigortunngornermik utoqqaat eqqorneqartartut amerliartortut. Taamaattumik kissaatiginikuuara taakkua peqqissaartumik sullilluarnissaat siunertaralugu pilersaarusiortoqassasoq kommunissatsinni, Kommune Qeqertalimmi borgmesterinngortussaq, Ane Hansen, Inuit Ataqatigiinneersoq, taama oqarpoq.

Qeqqatalu Kommuniani puigortunngortut katillugit 48-pput, puigortunngortullu amerliartornissaat pillugit pilersaakannerput.

- Pilersaarusiornissamut immikkoortitsivugut aningaasanik, taamaalillunilu 2019-inimi 2020-milu aningaasaliinissamut aamma piareersimalluni. Eqqaassavara aamma Naalakkersuisut apeqqutaasorujussuupput qanoq aningaasaleeqataarusutsiginerat, Hans Frederik Olsen taama oqarpoq.

Kommune Kujallermili suli pilersaaruteqanngillat. Utoqqaalli puigortunngortut amerliartornerat pinngitsooratik iliuuseqarfigisariaqaraat, Isumaginninnermut Ataatsimiititaliami siulittaasoq oqarpoq.

- Tassa nukissaqarfigisariaqassavarput. Tulleriiaarinitsinni ilannguttariaqassavarput. Amerligaluttuinnarput aamma ilarpassui suli angerlarsimaffimminni imminni kaammattorneqarlutik inissisimammata, Kommune Kujallermi inunnik isumaginninnermut ataatsimiititaliami siulittaasoq, Karla Egede Bisgaard, Siumumeersoq, taama oqarpoq.

Kommuneqarfik Sermersooq kommunini kisiartaalluni puigortunngortunut ataqatigiissaarisoqarpoq.