Pualasuut nikassarneqartarnerat ingasatsikkiartorpoq

Nunani assigiinngitsuni qulini ilisimatuut misissuipput, aamma inuiaqatigiinni ataasiakkaani pualaneq pitsaasutut qummullu isigineqarnermik kinguneqartartut akornanni misissuisimallutik.

- Inuiaqatigiinni ataasiakkaani inuit pualasuujunissaat pingaartinneqartarsimavoq. Pualasuujuneq atugarissaarnermut, meerartaarsinnaanermut aamma pinnersuunermut attuumatinneqartarlutik, misissuinermi inerniliussanut atuakkiortut ilaat, Alexandra Brewis videnskab.dk-mut oqarpoq.

Pualasuut taama isigineqarnerat ukiuni kingullerni allanngoriartupiloorpoq. Misissuinerit takutippaat, pulasuut pinniitsutut, eqiasuttutut imminnullu aqussinnaanngitsutut isigineqarnerulersimasut.

Pualasuunut ajorinninnerpaajupput nunat imaluunniit inuiaqatigiit aatsaat pualasuunik ammut qanittukkut isiginnilersimasut.

Assersuutigineqarluni qerqertaq Samoa, taanna amerikamit pigineqartoq, tassami tamaani 1990-ikkut tikillugit pualasuut pinnersutut isigineqartaraluarmata. Ullumikkut taama isiginninneq muminneqarsimavoq.

- Samoami pualasuut allatut isigineqarneri sukkasoorujussuarmik allanngorsimavoq. Tassami tamaani pualasuut sianiitsutut isigineqalersimammata, Alexandra Brewis oqarpoq.

Nunarsuatsinni peqqinnissap tamanit ilismaneqarnerulernissaa pillugu paasisitsiniaanerit pissutaallutik pinnissuseq qanoq ittuunersoq allanngortinneqarsimagunarpoq.