Inatsisitigut ataataqanngitsunut oqaloqatiginnittarfeqalertoq

Inatsisitigut ataataqanngitsut maanna tarnip pissusaanik ilisimasalimmut akeqanngitsumik sianersinnaalerput, tarnilli pissusaanik ilisimasalimmik naapitsinissartik piumanerugunikku aamma taamaaliorsinnaapput.

Namminersorlutik Oqartussat tusagassiutinut nalunaarummi taama allaaserisaqarput.

Inatsisitigut ataataqanngitsut peroriartornerminni misigisamikkut artorsaatigilersimasatik tarnip pissusaanik ilisimasalimmik oqaloqateqartarnermikkut oqaloqatigiissutigisinnaalerpaat.

AAMMA ATUARUK Inatsisitigut ataataqanngitsut pisinnaatitaaffii pillugit ataatsimiititsinerit amerlanerusut

Oqaloqateqarsinnaalernerallu inatsisitigut ataataqanngitsunit nuannaarutigineqarpoq:

- Peroriartornerup nalaani pakatsisarnerit pillugit tarnip pissusaanik ilisimasalimmik inatsisitigut ataataqanngitsut uattulli ittut oqaloqateqarsinnaaleratta assut nuannaarutigivara, Tida Ravn, inatsisitigut ataataqanngitsunut ikiuisoqarnissaanik pisariaqartitsinermik arlaleriarluni uparuaasarsimasoq oqarpoq.

- Oqaloqateqarsinnaanermut neqeroorneq inuppassuarnut iluaqutaajumaartoq ilimanarpoq, Tida Ravn oqarpoq.

Inatsisitigut ataataqanngitsut tarnip pissusaanik ilisimasalimmik akeqanngitsumik oqaloqateqarusuttut oqarasuaatip normuanut 34 50 50-imut pingasunngornikkut ualikkut nalunaaqutaq sisamaniit unnukkut nalunaaqutaq arfineq-pingasut tungaannut sianersinnaapput.

AAMMA ATUARUK Frederik blev kaldt faderløs og uægte

- Oqaloqateqarsinnaanermut neqeroorutip piareernera, Peqqissutsimut, Isumaginninnermut, Inatsisinillu Atuutsitsinermut Naalakkersuisup, Martha Abelsenip nuannaarutigaa:

- Inatsisitigut ataataqanngitsut assigiinngitsutigut meeraanertik nuanninngitsunik eqqaamasaqarfigivaat, taakkumi inuiaqatigiinni ajortumik pineqarlutik peroriartorsimapput. Taamatut peroriartorneq inuunerup sinneranut sunniuteqarsinnaavoq. Taamaammat kiisami inatsisitigut ataataqanngitsunut tarnip pissusaanik ilisimasalimmik oqaloqateqarsinnaanissamik neqeroorfigitissinnaalernerat nuannaarutigaara, Martha Abelsen oqarpoq.

Paasissutissat allat facebookimi qupperneq ”Information om indsatserne til juridisk faderløse i Grønland” imaluunniit www.sullissivik.gl aqqutigalugit pissarsiarineqarsinnaapput.