Professori: Tuluit qallunaallu meeqqanik pinnissimanerat assigiippoq
Danmarki nunarsuarmi nunani kisimiinngilaq meeqqanik angajoqqaavinit peersillugit nunamut allamut nuutsitaqarsimasoq.
- Oqaluttuarisaanermi meeqqat taama pineqartarnerat nutaajunngilaq. Meeqqat tamakku maanna inersimasunngorlutik oqallorissaarlutik ilinnigarissaarlutillu tutsiuttalersut soorunami politikerit iliuuseqarsinnaatilerpaat. Soorlu Tuluit Nunaanni Australiamilu utoqqatsernerit pisut. Ning de Coninck-Smith, Danmarks Pædagogiske Universitetsskolemi DPU-mi, Aarhus Universitetimut atasumi professori oqarpoq.
Tuluit ministeriunerunerata Gordon Brownip meerarpassuarnut angajoqqaavinit peersitanut utoqqatsernera qinersisoqalerneranik pissuteqartoq aamma oqaatigaa. Tuluit Nunaanni pisoq Danmarkip kalaallit meerartaasa pineqarsimanerannut assersuutissaqqippoq.
- Taamanikkut taamaattoqartarpoq. Ajorniaannarluni taamaaliortoqarneq-ajorpoq. Meeqqat ilaqutaalu eqqarsaatigalugit ajunnginnerpaaq anguniarlugu naalagaaffik taamaaliortarpoq. Ullutsinni taamaaliortoqarsinnaanera eqqarsaatigineqarsinnaanngilarluunniit, pissutsilli qanga allaapput, oqarpoq.
Danmarkip statsministeria maannamut kalaallit meerartaannut utoqqatserusunngilaq, oqarlunili naalagaaffeqatigiinnerup oqaluttuarisaanerani pisimasut taarnersat ilagigaat. Utoqqatsersinnaassanerpa? Ning de Coninck-Smith aperaarput.
-Nalunarpoq. Statsministeri utoqqatsissaguni imminerminut iluaqutissatut nalilertariaqassavaa, soorlu Tuluit ministeriunerata Gordon Brownip politikki tunngavigigaa, qinersingajalerneq eqqarsaatigalugu meeqqanut utoqqatserluni. Aamma imaassinnaavoq amerlasuut piumasarippassuk Danmarkip statsministeria utoqqatsertoq, Ning de Coninck-Smith Danmarkimi perorsaanermut universitetimi professoriusoq oqarpoq.
Arnaq taanna aamma isumaqarpoq, eqqorneqartut utoqqatseqqusinerat nutaamik nukittorsarneqartoq, tassami meeqqat ullumikkut ilinniarsimasuummata oqaasiliullaqqissuullutillu ingammillu inunnik paasisimasaqarluartunik tunuliaqutaqarlutik.
Meeqqat 22-t misiligutaanerannik suliamut tunngatillugu ilisimatusartutut suleqatigiit tassaasut Nunatta Atuagaateqarfia Katersugaasivialu, Syddansk Universitetimi Forsorgsmuseet og Center for Velfærdsforskning kingullermik naalakkersuisunut siunnersuuteqarput Meqqat misiligutaanerannik suliaq naqqa tikillugu misissoqqullugu. Taamatut misissuinissaq Naalakkersuitut siulittaasuata Kuupik Kleistip taperserpaa.
