Professor: Isummerfissarpassuupput
Nunatsinni naammattunik sulisussaqannginnerput aamma Alcoap sumiiffinni allani aningaasarsiakitsunik sulisoqarsinnaagami allami aluminiuliorfiliornissaminut periarfissaqarnera pissutaasut Paldamip oqaatigai.
Taamaattunik sanaartortoqassatillugu misilittagallit pisariaqartinneqartussaapput, Kalaallit Nunaannilu misilittagaqartoqanngilaq. Soorunami kalaallinik ataasiakkaanik sulisoqarsinnaassangaluarpoq, kisianni misilittagalippassuarnik peqanngilaq. Aluminiuliorfik ataaseq nukissiorfiillu marluk uani sanaartorniarneqarput. Naammassineqarlutillu tunisassiorfiulerunik ilaatigut kalaallinik sulisoqarsinnaassapput, assigiinngitsutigut pilersuisoqarnikkut aningaasarsiortoqassalluni kiisalu sinneqartoorutinit akileraartoqartassalluni. Tamakkua tamarmik sanaartulinnginnermi isumaqatigiinniutigineqartussaapput.
Kalaallit Nunaanniit annilaanngatigineqartoq tassa Kina-miorpassuit Kalaallit Nunaaginnalernissaat siunissamilu aluminiuliorfimmi sulisuulerlutik. Taamatummi pisoqarsinnaammat. Taamaattumik aallaqqaammut isumaqatigiinniarnerni siunissami pisinnaasut eqqarsaatigereerneqartariaqarput. Taamatut isumaqatigiinniarnerit aallartikaangata nalinginnaavoq suliffeqarfiit Alcoatut ittut pissaaneqartarnerat, sumiiffinnimi arlalinni suliffeqarfiliorsinnaasaramik oqaannarsinnaapput allami suliffeqarfiliorniarlutik. 20 miliarti koruuninilli aningaasaleereerunik nikeriarsinnaajunnaarsimassapput. Taamaammat siunissami ungasissumi qanoq pisoqarsinnaanera pissutsillu allanngorsinnaanerat piareersimaffiginiarlugu isumaqatigiissusiortoqartariaqarpoq - taakkualu unioqqutinneqartussaassanngillat, kisianni siunissami pisinnaasut tamarmik piareersimaffigineqarsinnaasanngillat. Taamaammat Alcoamiit kommuuni nunalu inissisimaffitsik inussiarnisaarfigisariaqarpaat, Martin Paldam oqarpoq.
Kalaallit Nunaannimi suliffeqarfinnik aningaasarsiorfiusinnaasunik pilersitserusullunilu Kina-miorpassuit ajornartorsiutigilersinnaanerat aarlerissutigigaanni suna pingaarnerutinneqartaiaqassava?
Kalaallit Nunaanni suliffissuaqalernissaa pisariaqartinneqartulissuuvoq, taamaammat Kina-miorpassuit aningaasarsiakitsut akueriinnartariaqarsinnaapput, Martin Paldam oqarpoq.
Aluminiuliorfiliassaq marlunnillu erngup nukinganit nukissiorfiliornissaq 20 miliarti koruuninik akeqassangatinneqarpoq, ukiunilu tallimani sanaartortoqarnerani sulisut 4.000-it atorfissaqartinneqassapput, agguataarlugit akunnerni 20 miliuunini sulisussat, DR-imiit Dorthe Krogsgaard ilanngutassiivoq.
