Prins Joachimip sulilernissani taqqamik milittoornermi kingorna kinguartikkaa

Prins Joachim Danmarkip Parisimi sillimaniarnermut suliaqarnerani septembarip aallaqqaataaniit sulilertussaagaluarpoq, tamannali sapaatini-akunnerni arlalinnik kinguartippaa.

Kunngikkormiut attaveqaqatigiinnermut immikkoortortaqarfiat Ritzauimut taama paasissutissiivoq.

- Prins Joachim suli peqqissiartorpoq, illersornissamullu suliaqarnermi atorfimmi nutaami septembarip ingerlanerani sulilernissani qilanaaraa.

- Nakorsat innersuussutaat malillugu prins eqqissiluni aallartikkiartussaaq – matumani angerlarsimaffimmi suliaqarnermi, tamannalu aamma Parisimi suliffissaani covid-19 pissutigalugu atuuppoq.

AAMMA ATUARUK Prins Joachim taqqamik milittoornermi kingorna napparsimmavimmit angerlartoq

- Prins Joachim semptembarip qiteqqunnerani sulilerniarpoq, kunngikkormiut paasissutissiipput.

Prins Joachim juulimi Frankrigip kujataaniitsilluni qaratsamini taqqamik milittoornermi kingorna suliaritippoq. Prins Joachim napparsimmavimmit aggustip aallartinnerani angerlarpoq.

Kingunerluuteqassanngitsoq

Prinsip 51-inik ukiullip nakorsat naliliinerat naapertorlugu taqqamik milittoornini timikkut allatigullu ajoqutigiliukkamik kingunerluutigissanngikkaa, kunngikkoriut siusinnerusukkut ilisimatitsissutiginikuuaat.

Kunngikkormiut sapaatit-akunneri marluk matuma siorna Instagramimut assimik ikkussipput, assimi tassani prins Joachim qatanngutaalu kunngissaq Frederik ilaqutariit slottianni Chateau de Cayximi ullaakkorsiortut takuneqarsinnaavoq.

Prins Joachimip Danmarkip Parisimi illersornissamik suliaqarnerani atuuffeqalissasoq tamanut juunimi saqqummersinneqarpoq. Atuuffik ukiunik pingasunik sivisussuseqarpoq, sivitsorneqarsinnaallunilu.

AAMMA ATUARUK Prins Joachim pitsanngoriartorpoq - ajoqutigilikkamillu kingunerluuteqassanani

Illersornissamut suliaqarnermi nunat akornanni – matumanilu Danmarkip Frankrigillu atassuteqarnerannik pilersitsinissaq ilaatigut suliassaavoq.

Prins Joachim Illersornissaqarfimmut ukiorpassuarni atassuteqarpoq, franskillu sakkutooqarfianni sakkutuutut ilinniarfianni Ecolé Militaireimi siorna septembarimi pisortatut ilinnialerluni.

Taamaammat prins prinsesse Marie meeqqatillu marluk, prins Henrik prinsesse Athenalu Frankrigimi najugaqarput.