Prins Joachim USA-mi sulinermini kunngikkormiut akissaataannik pissarsisaannassasoq
Prins Joachim illersornissamut tunngasuni aallartitatut USA-mi Washington D.C.-mi ukiaru sulilerpat, kunngikkormiut akissaataannik pissarsisinnaanissaa Folketingimi ullumi marlunngornermi taasisoqarnerani partiit amerlanerussuteqartut tapersersorpaat.
Prins Washington D.C.-mi atorfittaamini septembarip aallaqqaataani sulilissaaq.
DR taama allaaserisaqarpoq.
Prins Joachim naalagaaffimmit ukiumut 3,9 millionit koruuningajannik pissarsisarpoq. Kunngikkormiut ilaat kunngeqarfiup avataanut nuuppat kunngikkormiut akissaataannik pissarsisassanersoq Folketingip inatsit tunngaviusoq aallaavigalugu aalajangertassavaa.
Prins Joachim Washington D.C.-mi atorfeqarnerminut atatillugu taarsiullugu akissarsiaqassanngilaq.
Danmarkimi naalakkersuisoqatigiit partiit talerperliuniat tamarmik peqatigalugit siunnersuummut tapersersuipput.
Ministeriuneq DR-imut aamma oqaaseqarpoq:
- Kunngitut ataqqinassusilik Danmark sinnerlugu illersornissamut tunngasuni annertuumik pingaarutilimmillu Parisimilu suliaqarpoq, USA-llu sillimaniarnermut illersornissamullu tunngasuni suleqatigineqarnera nukittorsarparput.
Partiit SF, Enhedslisten Alternativetilu Prins Prins Joachimip USA-miinnermi nalaani kunngikkormiutut akissaataannik naalagaaffimmit pissarsiaqarsinnaanissaanut siunnersuummut akerliupput.
Kunngikkormiup politikkimut sakkussanillu tunngasuni siunnersortaanissaa naleqqutinngitsoq, SF-ip siunnersuummut tapersuisinnaannginnerminnut atatillugu oqaatigaa.
Folketingip siunnersuut inaarutaasumik upernaap ingerlanerani kingusinnerusukkut taasissutigisussaavaa.