Prins Joachim tulliuttutut inissisimanermut: Ajornaatsuinnaanngilaq

Prins Joachimip angunni Prins Henrik assigalugu kunngikkormiuni inissisimanini ilaatigut apeqqusertarpaa.

Frankrigimi atuagassiamit Point de Vuemit apersorneqarnermini taama oqartoq, aviisip Berlingskep DR-illu allaaseraat.

Kunngissap Frederiup namminerlu akornanni inissisimanini ilaatigut apeqqusernartoqartillugu apersorneqarnermini ilaatigut oqaatigaa.

- Akornatsinni pissutsit paasiuminaassinnaasarput. Kunngissap pisut malinnaavigiinnartussaavai.

- Kunngissamulli tulliuttup nuliatalu suliassai sukumiisumik nassuiaasersorneqanngillat, allagaatitut oqaasiinnartigulluunniit, Prins Joachim oqarpoq.

AAMMA ATUARUK Prins Joachim Parisimi sulilernissaminut piareertoq

Prins Henriup tamanna nammineq aamma ajornartorsiutigivaa, Prins Joachim atuagassiamut oqarpoq.

- Ataatama kunngikkormiuni inissisimanini ilaatigut apeqqusertarpaa, inuuninilu tamaat inissisimanini apeqqusertuartarsimallugu, prinsi oqarpoq.

Prins Henriup kunngikkormiuni inissisimaffini ammasumik qasseerpassuariarluni oqaaseqarfigisarsimavaa.

Dronningimut tullersortiinnartut, allaallumi nammineq sakkutooqanngikkaluarluni sakkutuut naalagaattut misigisarsimavoq, taaguutimi prinsgemali, aalajangersimasumik suliassaqanngitsutut inissisimanini apeqqusertarlugu.

Prins Joachim prinsesse Marilu 2008-mi katipput, meeqqatillu marluk peqatigalugit Frankrigip illoqarfiisa pingaarnersaanni Parisimi ullumi najugaqarlutik.