Prins Joachim Parisimi sulilernissaminut piareertoq
Prins Joachim illersornissamut tunngasuni nunani allani sinniisutut , Frankrigip illoqarfiisa pingaarnersaanni Parisimi tallimanngorpat sulillissaaq.
Kunngikkormiut nittartakkaminni taama allaaserisaqarput..
AAMMA ATUARUK Prins Joachimip sulilernissani taqqamik milittoornermi kingorna kinguartikkaa
Prins Joachim Frankrigip kujataani qaratsamini taqqamik ukioq manna juulimi milittoornermi kingorna tamanut siullerpaamik saqqummissaaq.
Ilaquttani peqatigalugit illussaarsuarmi Chateau de Cayximiitillunni qaratsamini taqqamik milittoorpoq. Tassanngaanniit Toulousep napparsimmavissuanukaanneqarpoq suliaritillunilu, aggustimilu angerlartinneqarluni.
Prinsip 51-inik ukiullip nakorsat naliliinerat naapertorlugu taqqamik milittoornini timikkut allatigullu ajoqutigiliukkamik kingunerluutigissanngikkaa, kunngikkormiut siusinnerusukkut ilisimatitsissutiginikuuaat.
Prins Joachim angajuminit kunngissaq Frederimmit Frankrigimi pulaarneqarpoq.
Nakorsat innersuussutaat malinneqarput
Prins Joachimip suliffimmini nutaami septembarip aallaqqaataani sulilernissaa pilersaarutaagaluarpoq, tamannali septembarip qiteqqunnissaata tungaanut kinguartinneqarluni.
- Prinsip septembarip qiteqqunnerata missaani sulilernissaa pilersaarutaajuarsimavoq, kunngikkormiut taama ilisimatitsipput.
- Nakorsat innersuussutaat malillugu prins eqqissiluni aallartikkiartussaaq – matumani angerlarsimaffimmi suliaqarnermi, tamannalu aamma Parisimi suliffissaani covid-19 pissutigalugu atuuppoq, kunngikkormiut paasissutissiisartuat Lene Balleby, SMS-ikkut taama ilaatigut allappoq.
Prins Joachim illersornissamut tunngasuni nunani allani sinniisutut Parisimi sulilertussaq ukioq manna juunimi nalunaarutigineqarpoq.