Prins Charles coronavirusimik tunillanneqarsimasoq
Prins Charles coronavirusimik tunillanneqarsimasoq paasineqarpoq.
Tuluit Nunaanni kunngikkormiut taama ilisimatitsisut, Sky Newsip allappoq.
- Sakkortunngikkaluanik ersiuteqarpoq, taamaattoq peqqippoq, angerlarsimaffimminilu ulluni kingullerni sulilluni.
- Cornwallimi hertugip, prins Charlesip nulia Camilla, aamma misissortissimavoq tunillanneqarsimannanili, kunngikkormiut oqaaseqaammi taama oqarput.
Aappariit ulluni makkunani Skotlandimiipput, tassani marluullutik mattussaaqqallutik.
AAMMA ATUARUK Tuluit Nunaanni katerittoqarnerani inuit marluk sinnissanngikkaat
Prins Charlesip coronavirusimik qanoq tunillanneqarsimanera ilisimaneqanngitsoq ilanngullugu nalunaarutigineqarpoq.
Prins Charles sapaatit akunnerini kingullerni aaqqissuussani assigiinngitsorpassuarni peqataasarsimanera tunillanneqarsimaneranut pissutaasimasinnaasoq, kunngikkormiut nalunaarutigaat.
Tuluit Nunaanni dronning Elizabethip, 71-inik ukiulik prins Charles ernimini angajullequtigaa.
Prins Charlesip coronavirusimik tunillanneqarsimanera, Tuluit Nunaanni innuttaasut amerlanerpaartaat angerlarsimaannaqqusaanerisa kingunitsianngua, nalunaarutigineqarpoq.
Coronavirusi Tuluit Nunaanni siaruatsaaliorniarlugu sakkortuunik killilersuisoqartariaqartoq, Tuluit Nunaanni ministeriunerup Boris Johnsonip ataasinngornermi unnukkut nalunaarutigaa.
Taamaammat Tuluit Nunaanni illoqatigiit minillugit katerittoqartillugu inuit marluk sinnissanngikkaat sapaatit akunnerini pingasuni inassutaagallarpoq.
