Povl Dissingimut eqqaaniut: Taalliaq tusaqqoornartumik erinaqartariaqanngitsoq paasitippaanga
Erinarsortartoq 84-inik ukiulik, Povl Dissing, sivisuumik napparsimareerluni ataasinngormat toquvoq.
Povl Dissing nunatsinniillunilu nipilersortartut nunatsinneersut soorlu Jorsi Sørensen aamma Nuka Absolonsen suleqatigalugit nunatsinnut tunngasunik imalinnik
saqqummersitsinikuuvoq.
1997-imi saqqummersitaa "Krakkemut Mat"-imik ateqarpoq.
Povl Dissing nunatsinni ingammik 1970-ikkunni nuannarineqarluarpoq. Ilaatigut Nuummi "Mutten"-imi Katuamilu 1998-imi aamma tusarnaartitsivoq.
Lykkelænder filmimut atsiunneqartoq
Dissingip erinarsuusiaata ilaat "lykkelænder" nunatsinni nuannarineqarluartunut ilaavoq. Lykkelænderilu nunatta Danmarkillu atassuteqarnerat pillugu 2018-imi filmiliamut atsiunneqarpoq.
Kommuneqarfik Sermersuumi kommunalbestyrelsimi ilaasortaq Juaaka Lyberth (IA) Povl Dissingilu aamma ilisimasariissimasuupput. Juaaka Lybertuhilu Povl Dissingimut eqqaaniummini ilaatigut ima allappoq:
- Poul Dissingimuna taallioriaasiata erinnioriaasiatalu inuusuttuusungali paasitikkaannga taallaq itisuunik imalik aamma tamatigut tusaqqoornartumik erinaqartariaqanngitsoq, aamma tusarnaartartunit nuannarineqarpallaanngikkaluarpalluunniit taalliaq erinniaq nammineq suliaq ilumoorfigiuartariaqartoq.
- Københavnimi ilinniartuunerma nalaani folkesangeritut meeqqallu erinarsuutaannik erinarsortartutut aallussilluarnikuuvunga, atuakkanik atorniartarfinni aamma folkesangerit klubbiini assigiingitsuni nipilersortuartarlunga. Nipilersortarfiilluukku tamakku ilaanni Poul Dissing naapikkinga ilisarisimalerlugulu.
- Qanortoq eqqissillutit qasuersaarit ikinngut Poul Dissing, erinarsuutinik asanninnermillu kissaappakkit – neriuppungalu sumiikkaluarnersutit eqqanni kaffi qalangajalissasoq.
Juaaka Lyberthip atuagaq "Svantes Viser" Svantep Niperujoorutaanik qulequtserlugu kalaallisuunngortitani 2019-imi saqqummersippaa.