POST-imi sulisut arlallit soraarsinneqarput
Eqqorneqartussat tassaapput nuna tamakkerlugu TELE-POST-it:
- Kikkut tamarmik ilisimalereerunnarsivaat allakkanik nassiussuisarneq ukiuni kingullerni appariarsimammat. Tamassumalu kinguneranik sulisunik ikililerisariaqartarsimavugut, atorfimminnik soraartut atorfiinik atorunnaarsitsisarluta. Tassalu maanna ajoraluartumik nuna tamakkerlugu sumiiffinni TELE-POST-ini soraarsitsinerit arlallit aalajangiuttariaqarsimallutigit, POST-imi pisortaq Per Svendsen oqarpoq.
Naatsorsuutigineqarsimagaluarpoq poortukkanik nassiussuineq allatsitsisarnerup piliaanik qaffariarsimasoq, tamannali kukkunermik naatsorsuusiortoqarsimaneranik pissuteqartoq pisortap Per Svendsenip oqaatigaa.
- Naatsorsuusiornermi kukkusoqarsimanera pissutaavoq. Poortukkat nassiunneqartut marloriarlugit kisinneqarsimapput, tamannalu tassa kukkussut ajuusaarnarpoq, Per Svendsen oqarpoq.
Kukkusoqarsimanera pissutaalluni tassa atorfiit ikililerneqartariaqarsimapput, sulisullu ilaat eqqorneqarlutik.
POST-ip aqunneqarnerani ajortoqarsimanerami?
- Immaqa ilaasa taama paasissagaluarpaat, eqqortorli unaavoq, ukiuni 400-ni allakkatigut nassiussisarnerit nunarsuatsinni tamarmi annikillerujussuarsimapput. Maani Nunatsinni uagut nuannaarutigiinnartariaqarparput aatsaat taama amerlatigisunik siornatigut soraarsitsiortortariaqarsimannginnatta, Per Svendsen oqarpoq.
Siorna sulisut 15-it soraarsinneqarput, sinerissami illoqarfinni aningaaseriveqanngitsuni POST-ip akiliisarnermik ingerlatsisuunermik pisussaaffeqarnera KNI Pilersuisumut toqqaannartumik nuunneqarnera pissutaanerulluni.
