Post Danmarki juullip inuata allaffissaanik pilersitsivoq
Qamutinik iluarsaassineq, tunissutissanik poortuineq juullimullu pilluaqqussutinik allanneq Juullip Inuata ulapputigisarpai.
Nunarsuatsinnilu meeqqat naalattut tamaasa Juulliaqqami tunissutisiassaannik naleqquttunik tunissagunigit sunik kissaateqarsimanersut ilisimasariaqarpaa. Juullillu Inua tassani suli ulappusernerusarpoq.
Meeqqat allassimasut ilaat Juullip inuanit akineqarnissaminnut utaqqilussinnartartut Post Danmarkip nalligilerlugit Juullip Inua Københavnimi allakkerisarfiliuuppaat. Adressealu aamma tassaagujoq Rensdyrvej 1, postboks 2412, 1566 København V.
Tamanna Kalaallit Nunaanni Takornariartitsivimmit nuannarineqanngilaq, ilisimatitsissutigaallu meeqqat allassimasut tamarmik akineqarumaartut Juullip Inuata neriorsuutigisimagaa - meeqqat siusissukkut allannissartik eqqaamaannassavaat.
Juullip Inuanut allakkat Nunatsinni uunga nassiunneqartarput, Juullip Inua, 2412, Nuuk, Kalaallit Nunaat.
- Allakkat juullimullu kortit juulli ullunik qulinik sioqqullugu tiguneqarpata, akineqarnissaat Juullip inuata allakkerisarfianit sapinngisamik isumagineqassaaq, aqerluusamik kuglepennimilluunniit allakkat juullertinnagu Danmarkimut apuunneqarniassammata, Nunatsinni illoqarfiit pingaarsaanniit, qaalloreqisumik apisimasumit, ilisimatitsipput.
Kisiannertaqanngitsuunngilarli - Juullip Inuanit inuulluaqqussutit Juulliarartinnagu apuutinngippata meeqqat naammagittartariaqassapput, juullimummi atuanngiffeqarnermi takkutissaqqaarput, Nuummi Takornariaqartitsivik ilisimatitsivoq.
Angajoqqaat meeqqaminnut nukangasunut tamanna qanoq nassuiaassaneraat nalunaarummi ajoraluartumik allassimanngilaq.
