"Possible Greenland" aallartilluarpoq

Venedig-mi Giadini Pkarimi qallunaat illuutaanni saqqummersitsineq Possible Greenland ammarneqarpoq. Qaammatit pingasut ingerlanerani inunnit 100.000-nit takuniarneqarnissaa ilimagineqarpoq.

Atuagassiami Arkitektenimi aaqqissuisoq Kjeld Vindum naliliivoq saqqummersitsinermi Kalaallit Nunaat assut maluginiarneqarumaartoq.

- Illussanik titartaasartut saqqummersitsineranni Biennalenimi inuit illussanik titartaanermik suliallit nuimasut najuuttarput. Taamaammat Biennalenimi takuniaasut amerlanerit tassaajumaarput illussanik titartaasarnermi inuit pingaarutillit, oqarpoq.

Taassuma tupaallaatiginngilaa Dansk Arkitektur Centerip nalunaarnera ukiormanna saqqummersitsinermi Kalaallit Nunaat qulequtarineqassasoq aammalu qularutiginngilaa tamanna soqutiginnilersitsilluarumaartoq.

- Isumaqarpunga Kalaallit Nunaata maluginiarneranik kinguneqarumaartoq. Amerlannguatsiarput Kalaallit Nunaannut soqutiginnittut. Aamma qularinngilara ukiuni aggersuni Kalaallit Nunaat soqutigineqassaqisoq, Kalaallit Nunaat illussanik titartaasarut, silap pissusaanik ilisimatusartut pisuussutinik misissuisut allarpassuillu soqutigisaannik imaqarmat. Taamaammat isumaqarluinnarpunga oqallitsitsilernissamut Kalaallit Nunaat aqqutaasinnaalluartoq, oqarpoq.

Biennalenimi saqqummersitsinermi malinnaasoq alla tassaavoq takornariaqarnermut ilisimatusartoq Carina Ren Aalborgip Universitetianeersoq. Taanna isumaqarpoq siusinnerusukkut Kalaallit Nunaata saqqummiunneqartarneranit manna allaanerulluinnartoq.

- Nunanut allanut Kalaallit Nunaata saqqummiuttarneranit una saqqummersitsineq allaanerulluinnarpoq. Siornatigut Kalaallit Nunaat avinngarusimasutut saqqummiunneqartarpoq. Maannali nunani tamalaani ineriartornermut qitiulluinnartutut Kalaallit Nunaat saqqummiunneqarpoq, oqarp0q.

Taanna isumaqarpoq maanna saqqummersitsinermi Kalaallit Nunaat naalagaaffittut saqqummilaartinneqartoq.

- Saqqumilaartitsinermi erserpoq Kalaallit Nunaat siuariartortoq aammalu nunalerinermi pisuussutinillu atuinermi qitiulluinnartoq. Taamaasilluni imminut oqaluttuarisarneq allanngussaaq aammalu oqaluttuarineqartarnera allanngussalluni, oqarpoq.

Biennalen novemberip 25-iata tungaanut saqqummersitsiviuvoq tamatumalu kingorna Nuummi, Sisimiuni, Ilulissani Qaqortumilu saqqummersinneqassalluni.

KNR-mi sulisut ilaat Venedig-miippoq. Dansk Arkitektur Center angalanermut akiliussisuuvoq.