Inissiisarfinniittut inuiaqatigiinnut akuulerseqqinniarneqarnerat pitsaasuusoq
Pinerluttunik Isumaginnittoqarfik Naalagaaffiup suli ataaniippoq. Naalakkersuisoqatigiilli isumaqatigiimminni allapput, "pineqaatissinneqarsimasut inuiaqatigiinni pitsaasumik inooqataalernissaannut siunnersuisarnikkut pikkorissaasarnikkullu aqqutissiuussinissaq" anguniarneqassasoq.
Tassalu inuiaqatigiinnut akuutilersitseqqikkusupput, tamannalu pinerluttunik isumaginnittoqarfiup suliareriigaanut naapertuulluassasoq, pisortaq Naaja Nathanielsen isumaqarpoq.
- Tamanna pineqaatissinneqarsimasunut inissiisarfimmiittut inuiaqatigiinnut akuutileqqinnissaannut, innuttaasut Naalakkersuisullu siornatigut ujartortagaannut, naapertuuppoq, Naaja Nathanielsen oqarpoq.
Nunatsinni innuttaasut amerlanerussuteqartut iliuuseqartup aallaavigineqartarneranik taaneqartartumut tapersiisut, pinerluttarneq aamma naapertuilluarnermik misigissuseq pillugit Københavnip universitetiata ukiut pingasut matuma siorna misissuinerata takutippaa.
AAMMA ATUARUK Misissuineq: Pinerluttut inuiaqatigiinni inooqataaleqqinnissamut sungiusarnissaat orniginerugipput
Kalaallit sisamaagaangata pingasut akissuteqarput, "pinerluuteqartoq ikiorlugu tapersersersorusukkitsik taamaalilluni pinerluuteqaqqinnginniassammat".
15 procentiinnaat akipput, "innuttaasut pinerlunnermut akuersaannginnerat malugitillugu pinerluttoq pillarneqassaaq".
Naalakkersuisoqatigiilli suliamik immikkut sammisaqarnerat pinerluttunik isumaginnittoqarfiup sulineranut allannguinavianngilaq.
- Ullumikkut ingerlanerput allanngussanngilaq, Naaja Nathanielsen oqarpoq.
Taanna naapertorlugu inissiisarfimmiittut pinerloqqinnginnissaannut inuiaqatigiinnilu akuunerunissaannut iliuuseqartoqalereerpoq:
- Ilinniarnerunissaannut suliffeqarnissaannullu periusissialiulereerpugut, isumaginninnerlu pillugu kommuninut, Namminersorlutik Oqartussanullu suleqateqarluarnerunissamut assigiinngitsunik suliniuteqarluta. Taakkualu nangillugit suliarissuagut, Naaja Nathanielsen oqarpoq.
