Misissuineq: Pinerluttut inuiaqatigiinni inooqataaleqqinnissamut sungiusarnissaat orniginerugipput

Angisuumik misissuisoqarneratigut erseqqissumik paasineqarpoq, Nunatsinni pinerluttut akiorniarneqarneranni, inuiaqatigiinni inooqataaleqqinnissamut sungiusaaneq allanit pilerinarnerusoq.

Iliuuseqartup aallaavigineqartarneranik taaneqartartoq, tassa pinerluuteqartup iliuuserisaa pingaarnerutinnagu, kinaanerata isiginiarneqartarnera kalaallit innuttaasut akornanni sungiusimaneqarneruvoq.

Kalaallit pinerluuteqartarnermut pillaasarnermullu paasinnittarnerat, kinguaariit arlallit matuma siornagut tassa 1948-mi ilisimatuut arlallit misissuinerminni paasisaannut assingusorujussuuvoq.

Pinerluttarneq aamma naapertuilluarnermik misigissuseq pillugit Nunatsinni Danmarkimilu Københavnip Universitetianit misissuinerup tamanna paasinarsisippaa.

Danskit kalaallillu akissutaat assigiinngitsuusut

Misissuinermi kalaallit sisamaagaangata pingasut akissuteqartarput, ‘pinerluuteqartoq ikiorlugulu tapersersorusukkitsik taamaalilluni pinerluuteqaqqinnginniassammat’.

Qallunaat akissutaat qimerlooraanni akissutit killormorluinnangajak sammiveqarput.

Misissuinermi aamma paasisat ilagaat inunnik ulorianartorsiortitsilluni pinerluuteqartarneq - tassa toqutsineq, nakuuserneq pinngitsaaliillunilu atoqateqarneq - Danmarkimut sanilliullugit Nunatsinni amerlanerujussuusartut. Kalaallit pingasuugaangata marluk isumaqarput pinerluuteqartarneq ajornartorsiutaasorujussuusoq.

Tamannali pissutigalugu annilaanganerulerneq ajorpugut. Tassami aperineqartut sisamaagaangata pingasut pinerluffigineqaratarsinnaanertik eqqarsaatigineq ajorpaat.

Pineqartoq KNR-TV-mi unnugu annerusumik sammineqassaaq, tassa folketingimut qineqqusaartut apeqqarissaarfigineqarlutik eqqartuussiveqarneq oqallisigissammassuk.

Apeqqarissaarneq unnugu nalunaaqutaq arfineq pingasut qeqqanut aallartissaaq.