Politiinik iluarsartuusseqqinneq: Suliat ingerlaarfii pisariinnerusut politimesterilu nutaamik taaguuteqalertoq

Danmarkip politeeqarfinnut nutaanut agguarneqarnerannik ilaatigut kingueqartumik, Danmarkimi politiit 2007-imi iluarsartuunneqangaatsiarput. Savalimmiunili nunatsinnilu politiit tamatumani puigugaapput - taakkunani suut tamarmik taamaaginnarput.

Taamaakkunnaassaarli. Kalaallit Nunaata Politiivi aaqqissuussaanikkut Danmarkimi allatulli sinaakkuserneqalerput.

Kalaallit Nunaata Politiivisa namminneq Inatsisartullu iluarsaaqqinnissamik kissaatigisaat Folketingip naatsorsuutigineqartutut upernaaq manna akuersissutigippassuk tamanna pissaaq.

- Taamaaliorneq innuttaasut malugerpiassagunanngilaat, uagutsinnulli politiini unnerluussisussaatitaasunilu sulisuni isumaqangaatsiassaaq, politimester Bjørn Tegner Bay KNR-imut oqarpoq.

Suliani angisuuni pingaartoq

Allannguinermi politeeqarfinnik pilersitsineq matusinerluunniit, sulisut nuunnerat politiillu ikilinissaat amelinissaalluunniit pineqanngillat. Iluarsaaqqinnerliuna politiit politeqarfinnik allanik suleqateqariaasiannut tunngasoq.

Tassami Kalaallit Nunaanni Politiit inatsisilerinermi ministereqarfimmut maanna toqqaannartumik attaveqartuupput, politiilli nunami immikoortortaat taanna naalagaaffeqatigiinni politiit nunami immikkoortortaat allat 13-it assigalugit naalagaaffiup politiivinut atalissapput.

Tassalu suleqatiginninnissamik apeqquteqaatit Kalaallit Nunaanni Politiinit imaluunniit Fynimi politiinit takkunnersut apeqqutaajunnaassaaq. Suleriaaseq eqaannerulissaaq, tamannalu ingammik angisuumik iliuuseqarnermi aalajangiisuusassaaq.

- Suliassarujussuaqartilluta - soorlu Karrani tassaarsuaqarneranisulli - nalagaaffeqatigiinni sumi pisoqarnera apeqqutaalluni politeeqatinut attaveqarniarnermi assigiinngitsunik periuseqarneq tukatsitsilaarami, politimester Bjørn Tegner Bay oqarpoq.

- Uagut naammassinnilertorsinnaaqqajumalluta naalagaaffeqatigiinni suleqatitta periaasii atorsinnaagutsigit pingaaruteqarpoq, taanna oqarpoq.

AAMMA ATUARUK Politimesteri: Imigassamik atueriaaserput allanngortittariaqarparput

Iluarsaaqqinnermi pingaarutilinnut ilaavoq, Kalaallit Nunaanni Politiinut maalaarutit politiinut maalaarutiginnittarfimmut sumulluunniit attuumassuteqanngitsumut maalaarutigineqartalissammata.

Tassalu Kalaallit Nunaanni Politiini atorfillit maalaarutit suleqatiminnut tunngasut suliarisarunnaassavaat.

- Politiiusugut naammagittaalliutigineqarutta, inatsisaatsuliorsimasutulluunniit nalunaarutiginiarneqarutta, taava naammagittaalliuut politiit nunami immikkoortortaanniittuusugut nammineq suliaralugu politiit pillugit maalaaruteqartarfimmut nassiuttarunnaassavarput. Politiinut maalaarutiginnittarfiup sumulluunniit attuumassuteqanngitsup tamanna suliarisalissavaa, Bjørn Tegner Bay oqarpoq.

Politimesteriujunnaarluni politiinut pisortanngussasoq

Taava aamma suunngitsunnguamik kusassaammik aamma allanngortoqassaaq.

Bjørn Tegner Bayip saqqarmiua politimesterimik allassimasoqarunnaassaaq, taarsiulluguli politiit pisortaannik allassimalissalluni.

- Arlaannut sunniuteqaminissappat uannuussaaaq. Taaguutiga kisimi allanngussaaq. Uanga sulininni atuuffinnut, aningaasarsiannut atorfininninniluunniit atukkannut sunniuteqassanngilaq, taanna oqarpoq.

- Taamaaliornikkut politiit nunami immikkoortortanut allanut naligiisinneqarnerput ersersinniarneqarpoq, taamaammallu Kalaallit Nunaanni Politiit politiit nunami immikkoortortat allat assigalugit politiit pisortaannit siuttuuffigineqassaaq.

- Suli politimesteritut taagoraluarussinnga naammagittaalliungaarnaviarunanngilanga, Bjørn Tegner Bay oqarpoq.