Politimesteri: Kalaallit Nunaannut sioorasaarisoqarneranik takussutissaqanngilaq
Nunatsinni politiit taamaasillutik "upalungaarsimaniarnerat malunnaatilimmik annertunerulerpoq". Politimesteri Bjørn Tegner Bay taama oqarpoq:
- Naalagaaffimmi ataatsimut isigalugu upalungaarsimasoqarnerunissaa peqqussutaavoq, Kalaallit Nunaannulli sioorasaarisoqarsimaneranik takussutissaqanngilaq, politimesteri Bjørn Tegner Bay oqarpoq.
Nunatsinnili peqqarniisaarniartoqarsinnaaneranik takussutissaqarnersoq nammineq nalilertaripput, Bjørn Tegner Bayip oqaatigaa:
- Kingullermik nalilersuigatta tallimanngormat pivoq, Parisimi saassussisoqarmat naliliilluta. Kalaallit Nunaannilu assingusumik pisoqarsinnaanneranik takussutissaqanngitsoq nalilerparput, sioorasaarisoqarsimannginnamimi, Bay oqarpoq.
Aamma atuaruk LIVE & ASSIT Attaveqaqatigiittarfinni #Paris pillugu nutaarsiassat kingulliit
Politiilli upalungaarsimaniarnerisa malunnaatilimmik annertunerulernera qanoq paasisassaanersoq politimesteri aperaarput:
- Pilersaarutivut qimerloortarpavut. Sulisut atorfissaqartitat attaveqarfigiuarneqarsinnaanissaat qulakkeerniartarparput, pinartumik pisoqartillugu qaqugukkulluunniit attaveqarfigisinnaassallutigit, politimesteri oqarpoq, upalungaarsimaniarnermut ataatsimiititaliaq aamma suleqatigilluinnarlugu pilersaarusiortarput, peqqinnissaqarfik, Issittumi Sakkutooqarfik suleqatigineqartartullu pingaarutillit allat attaveqarfigineqartarput, pinartumik pisoqassagaluarpat upalungaarsimasussat piareersimatinneqartarlutik, politimesteri Bjørn Tegner Bay oqarpoq.
