Politeeq Ilulissani toqutsisoqarsimaneranik suliaq pillugu: Assingusumik takusaqarnikuunngisaannarpunga
Ilulissani ikuallaavimmi sulisoq inuup timaata ilaanik arfininngornermi unnukkut nalunaaqutaq 20.30 nassaarpoq.
Inuup timata ilaa eqqakkat ikuallanneqartussat akornanni nassaarineqarpoq.
Tamanna politiini vicepolitiinspektøri, Gideon Quist inuup timaata ilaata assinganik takunnissimavoq, taannali annikitsortat pillugit oqaaseqarnianngilaq.
- Uanga suliaq immikkuullarittutut isigivara, uanga ukiut 20-t politiiutillunga aatsaat taamatut misigisaqarpunga. Tupannarpoq.
- Taanna nassaarisarput peqqutigalugu piaartumik sulivugut aamma nalugatsigu susoqartoqarpiarsimanersoq. Toqutsisoqarsimasutut suliarivarput.
Politiit suliaq maanna toqutsisoqarsimaneratut suliaraat. Nassaarineqartoq arnaanersoq angutaanersorluunniit politiit naluaat. Pineqartorli meeraanngilaq, inersimasuunissaa takuneqarsinnaasoq, vicepolitiinspektøri nassuaavoq.
Toqutsisoqarnera sapaatip akunnerata siuliani pisimasinnaasoq Gideon Quistip politiillu nalilerpaat.
AAMMA ATUARUK Ilulissani politiit: Ilulissani ikuallaavimmi eqqumiitsumik nassaartoqarpoq
Suliaq pissutigalugu politiit Danmarkimit Nuummiillu ikiuiartortoqarnissaanik piumasaqarput. Politiit suliamut atatillugu ikuallaavimmi takussutissanik allanik ujaasinerminni qatserisartunik suleqateqarallassapput.
Assi: Kathrine Kruse / KNR.
- Immikkut toqusimasunut ilisimasalik nakorsaq Danmarkiminngaanniit tikinnissaa utaqqivarput. Taanna sukumiisunerusumik oqaatigisinnaavaa qanga pisimasoq, angutaanersoq arnaanersoq imaluunniit inuttaa qanoq angissuseqarnersoq, kalaaliunersoq imaluuniit qallunaajunersoq. Taanna utaqqisariaqarparput tikinnissaa.
Politiit inummik maqaasineqartutut nalunaaruteqarnermik ilisimasaqannginnertik pissutigalugu innuttaasunit ikioqqupput.
- Innuttaasut ikiuussinnaapput inuup timaata ilaa nassaarisarput pillugu, tassami nalugatsigu kinaasinnaanersoq. Massakkuugallartumik arnaanersoq angutaarnersorluunniit naluarput. Ilulissani innuttaasut ilaquttaminik ikinngutiminik arlaannilluunniit sivisuumik attaveqarfigisinnaasaqarsimanngikkunik innersuussutigissavarput politeeqarfimmut saaffiginneqqullugit, Gideon Quist oqarpoq.
Ilulissani politiit ikuallaaviup eqqaa suli matoqqatippaat.
Politiit oqarasuaammut 70 14 48-mut attavigineqarsinnaapput.
