Politikkikkut siammasissumik suleqatigiittoqarnissaa ujartorpaat
Siumut Inuit Ataqatigiillu naalakkersuinikkut imminnut qanittumik eqqarsartaaseqartut, Lars Emil Johansenip oqaatigaa, tamannalu eqqarsaatigalugu suleqatigiissinnaanissaat pissusissamisoorsoraa, imalu nangilluni:
- Ajoraluartumik ukiuni kingullerni imaalersimavoq Siumukkut Inuit Ataqatigiillu illuatungereeqqissaarlutik, akerlereeqqissaarlutik inissisimallutik imminnut ungasinnerpaallutik. Soorlu Danmarkimut assersuutissagaanni talerperliit saamerliillu unammisarnerattut. Nunatsinni partiit saamerliit marluk taama inissisimapput, uanga taanna tulluarsorivallaanngilara, Inatsisartut siulittaasuat Lars Emil Johansen oqarpoq.
Politikkikkut siammasissumik suleqatigiittoqarsinnaanissaa, Avatangiisinut Pinngortitamullu Naalakkersuisup Kim Kielsenip aamma orniginartinneruaa:
- Partiit akornanni siammasissumik suleqatigiittoqarsinnaasariaqarpoq. Soorunami isumaqatigiinngiffeqartarsinnaavoq, suleqatigiinnissarlu ajornakusoorsinnaasassalluni, kisianni suleqatigiittoqartariaqarpoq. Innuttaasut sinnerlugit sulivugut, pitsaanerpaamillu sullittussaallugit. Qinigaaffinni kingullerni marlunni iligiikkuutaarluni naalakkersuinikkut sulisoqarsimavoq, Avatangiisinut Pinngortitamullu Naalakkersuisoq Kim Kielsen oqarpoq.
Politikkikkut siammasissumik suleqatigiittoqarnissaa, Siumup siulittaasuata Aleqa Hammondip aamma pissusissamisoorsoraa:
- Nunatsinni ataatsimoortoqarnissaa aatsaat taama pingaaruteqartigilernikuuvoq, soorlu Naalakkersuisoqatigiinnissamut isumaqatigiissummi taama oqartugut, nuna ataasiusoq, inuiaat ataatsimoortut. Partiimi ataatsimoornissaq aamma pingaaruteqarpoq, soorlu Siumumi taamaattugut. Siulittaasoq katersuuffigaat, partiimilu avissaartuuttoqarani, Siumup siulittaasua Aleqa Hammond oqarpoq.
Qinersiviup siuliani matumanilu politikkikkut iligiikkuutaarluni naalakkersuinikkut ingerlatsisoqarsimavoq, tassa blokpolitikkimik ingerlatsisoqarsimalluni. Aleqa Hammondilli oqaatigaa siammasissumik suleqatigiittoqarnissaanik suliniuteqarsimallutik:
- Siumut suleqatigiikkumatuujuvoq, suleqatigiinnissamut kajumissuseqartuarnikuulluni. Siulianili naalakkersuisuusunut isumaqatigiinniarnissamulluunniit qaaqquneqarnikuunngilagut. Uagut partiit ataasiakkaarlugit qaaqquagut, oqaloqatigalugillu. Naallu amerlanerussuteqaraluarluta naapiffissarsiortuarsimagaluarluta, Siumup siulittaasua Aleqa Hammond oqarpoq.
