Politikkikkut pissutsit atuuttut pissutigalugit tunuarniuteqarnerarpaat

London Miningilli Danmarkimi oqaaseqartartuata tamanna illuatungilerpaa, Nunatsinni politikkikkut pissutsit nutaat atuuttut pisortap tunuarniuteqarneranut pissutaanngitsut oqaatigalugu. Pisortallu tunuarniuteqarnera saviminissamik piiaaffeqalersinnaanissamut pilersaarutinik kinguaattoortitsinngitsiq taassuma ilanngullugu aamma oqaatigaa:

London Miningip pisortaa, Xiaogang Hu, Isukasiani pilersaarummut atatillugu - tassa Nuup Kangerluani saviminissamik piiaaffiliorniarnermut atatillugu - suleqataajunnaartussanngortoq, ippassaq oqaluttuaraarput. Taassuma oqaatigaa pilersaarut pissutigalugu taamaatinniarani - namminerli inuttut atukkani pissutigalugit uninniarluni.

Pisortalli tunuarniuteqarneranut pissutsit allaasut, Berlingske Businessip nittartagaani atuarneqarsinnaavoq.

Tusarfiit Xiaogang Humut qanittut aviisimit oqaloqatigineqarsimapput, saviminissamillu piiaasinnaalernissamut qinnuteqaatit akuersissuteqarfigineqarnissaannut paamaarussisoqarnera Xiaogang Hup aarleqqutigisimavaa, pilersaarutit 2015-imi aatsaat piviusunngortinneqarnissaat taassuma aarlerisimagamigit.

Suliniutinut angisuusunut inatsisip allanngortinneqarnissaanik, inatsisillu sinaakkutissat aatsitassarsioqatigiinnut atuuttut assigiinngitsut naalakkersuisunngoqqammersunit allanngortinneqarnissaat kinguaattoornernut pissutaassasut taassuma oqaatigaa.

Inuit Ataqatigiit siuttoralugit naalakkersuisuunikut Kinamiunik sanaartornerup nalaani sulisoqarsinnaanissamik tapersersuipput, Siumullu siuttuuffigisaanik maanna naalakkersuisut akerliullutik, Xiaogang Hullu tunuarniuteqarneranut tamanna aamma pissutaaqataasoq oqaatigineqarpoq. Berlingske Business taama allappoq.

Pisortap tunuarniuteqarneranut tusatsiakkat London Miningip Danmarkimi oqaaseqartartuata Per Bech Thomsenip tusarsimavai, pisortarli nammineq inuttut atukkani pissutigalugit tunuarniuteqartoq, taassuma erseqqissaatigaa:

- Xiaogang Hup tunuarniuteqarnera Kalaallit Nunaanni politikkikkut pissutsinut nutaanut atuuttunut tunuliaquteqanngilaq, Per Bech Thomsen Radioaviismut oqarpoq.

Pisortap tunuarniuteqarnera Nup angerluani Isukasiani saviminissamik piiaaffeqalersinnaanissamut pilersaarutinik kinguaattoortitsinngitsinavianngitsoq taassuma ilanngullugu oqaatigaa.

Nalunaarusiat pisariaqartinneqartut, London Miningip Nunatsinni oqartussanut tunniutereerpai, saviminissamillu piiaasinnaanissamut akuersissutit oqartussanit tunniunneqarnissaat maanna utaqqiinnalerlugit.

London Mining Greenlandip pisortaata tunuarniuteqarnera, London Miningip paasissutissiisartuata Kaj Kleistip oqaaseqarfigerusunngikkallarpaa, erseqqissaassutigaali pisortap tunuarniuteqarnera nammineq inuttut atukkanik pissuteqartoq.

Xiaogang Hup taartissaa London Miningimit maanna atorfinitsinniarsarineqaleruttorpoq.