Politikki aalajangiisuuvoq
Puisi A/S-imut tunngatillugu eqqartuussisutigut suliami aalajangiineq politikkimit sunnersimaneqarpoq.
Puisimmi neqaannik pølsiliorniarneq taamanikkut Namminersornerullutik Oqartussanit aningaasalersorneqarmat, millionilikkaanik annaasaqaataaffiusinnaanissaa ilimagineqarsinnaasimassammat, unnerluutigineqartut tamarmik Kalaallit Nunaata Eqqartuussivianit pinngitsuutinneqarput.
Namminersorlutik Oqartussat Puisi A/S-imut tunngatillugu eqqartuussisutigut suliami ajorsarput. Puisi A/S-ip ukiut aqqanillit matuma siornatigut akiliisinnaajunnaarluni millionilikkaanik annaasaqarfiuvoq, Nunattalu eqqartuussisuunera Søren Søndergård Hansen eqqartuussummut tunngavilersuutit saqqummiukkamigit ilaatigut oqaatigaa Puisi A/S-ip siulersuisui, qullersaqarfia kukkunersiuisullu Namminersorlutik Oqartussat annaasaannik 22 millionit koruuninik akiliisitaassanngitsut, naak Namminersorlutik Oqartussat taama piumasaqaateqarsimagaluartut.
Suliffeqarfiup aningaasartuutigisassatut naatsorsuutai amigaateqartut, taamanikkut naalakkersusiut paasitinneqarsimanerat pinngitsuutitsinermi tunngavigineqarput.
Taamanikkut pilersitsinissaq aalajangiunneqarmat 12 millionit koruuninik qularneqaveeqqusiinissaq aalajangiunneqarpoq, taamaattumillu aningaasat annaaneqarsinnaasutut isumaqarfigisat naalakkersuisunit akuerineqarsimallutik.
Aningaasaqarnermut Pisortaqarfiup qularnaveqqusiinissamut taamanikkut aamma apeqqusiisimanera eqqartuussisuunerup ilaatigut tunngavilersuutigaa, Puisip aningaasarsiorfiusinnaanerata nalornissutigineqarnera tikkuarlugu.
Puisi A/S-ip ingerlaannarnissaa qinikkanit taamanikkut aamma kissaatigineqarsimanerarpaa, naak suliffeqarfik aningaasatigut ajornartorsioraluartoq.
Taamanikkut naalakkersuisunut siulittaasuusup Jonathan Motzfeldtip Puisimut tunngatillugu isumalluarnera eqqartuussisuunerup ilaatigut aamma tunngavilersuutigaa.
Puisi A/S-imut tunngatillugu eqqartuussisulersuussinermi suliassat aappaanni siulersuisut, qullersat, kukkunersiuisullu akisussaassuseqanngitsumik pissusilersorsimanerarneqarput, matumanili aamma pinngitsuutinneqarlutik.
Suliffeqarfiup aningaasatigut ingerlanerliorneranut atatillugu siulersuisut annertunerusumik paasiniaasimagaluarnerat pinngitsuutitsinermi ilaatigut tunngavilersuutaapput.
Namminersorlutik Oqartussat eqqartuussisulersuussinermut atatillugu aningaasartuutinik katillugit 6 millionit koruuninik akiliisussanngortinneqarput, suliarlu Østre Landsretimut ingerlateqqinneqarsinnaavoq.
Taamaaliortoqassanersorli suli nalunarpoq, eqqartuussinerup inernerata sukumiinerusumik atuarneqarnissaa tunngavilersuutigineqarluni.
Naalakkersuisut siulittaasuat Kuupik Kleist eqqartuussut pillugu oqaaseqarusunngikkallarpoq, eqqartuussut sukumiinerusumik atuarneqareerpat aatsaat oqaaseqarumagamik.
