Politikkerip biilia serlersaarfigineqarpoq
Inatsisartuni ilaasortaq Knud Fleischer ullaaq biiliussissamaalerluni kamanaatsumik misigisaqarpoq. Pinerluttut suli kinaassusersineqanngitsut biilit qalipaammik serpalitsarsimavaat assakaasuilu marluk qaarsimallugit. Biilip iluanut aamma spritimik kueraasoqarsimavoq.
- Assorujussuaq misigisaq tujorminarpoq. Tassa Kattusseqatigiit Partiiat qimakkakkuli kamanaalliorfigineqartarpunga. Matumali unitsinnavianngilaanga aamma Atassut sinnerlugu Inatsisartunut qineqqusaarniarpunga, Knud Fleischer KNR.gl-mut oqarpoq.
Suliaq maanna politiinut nalunaarutigineqareerpoq paasiniaanerlu suli ingerlavoq.
- Politikerip biilia serlersaarfigineqarsimavoq. Kisianni maanna oqaatigisinnaanngilarput politikkimik tunngaveqartumik serlersaarisoqarsimanersoq paasiniaanerup tamanna takutikkumaarpaa. Suliaq ilungersunartutut isigaarput, politimestereqarfimmi unnerluussisussaatitaasoq Maja Schiøtz KNR.gl-mut oqarpoq, taassumali saniatigut oqaaseqaqqissinnaanngikkallarnerarluni.
Knud Fleischerip biilia maanna iluarsaatingaatsiartariaqalerpoq. Biilip ilua salinneqartussaavoq aamma qalipaat biilip saneraanut serpalitsaatigineqarsimasoq piiarneqartussaalluni.
