Politikerit pingaarnersiuisariaqartut

Taamaammat politikkerit inoqarfiit innuttaasoqartikkusutatik pilerinarsartariaqarlugillu najoruminarsartariaqarpaat. 
Inuussutissarsiorneq pillugu ataatsimeersuarnerup naggataarnerani Inuiaqatigiit pillugit ilisimatooq taama oqarpoq.

- Inuit inoqarfinnut anginernut nutserusussuseqarnertik takutippaat. Kisianni aamma illua tungaanut nutsertoqartarpoq, kisianni taassa inoqarfinnut anginernut nutsertartut amerlanerupput, 

Nunarput marlunnik annertuunik unammilligassaqarpoq. Inuit inoqarfinnit mikinerusuniit anginerusunut nutserarput, taamalillunilu inoqarfiit mikinerit inuerukkiartorlutik. 

Inuiaqatigiit pillugit ilisimatooq Klaus Georg Hansen taama nassuiaavoq.
Inoqarfinnut mikinernut nuuttartut amerlavallaarunnaajutigalutik inoqarfinnit mikinernit nuuttartut amerlassusaat allanngunngimmat, inoqarfiit mikinerit annertuumik massakkut eqqugaaqqapput.

Tassalu inoqarfiit mikinerit innuttaasui ikiliartuinnarput.

AAMMA ATUARUK Siuariartornissaq Future Greenlandimi sammineqassaaq

Nuummullu nuuttartut maanna amerlapput. Tamannali aamma allanngorsinnaavoq. 

- Aamma Nuummi taamaattoqarsagunarpoq. Nuummut nuuttartut taama amerlatigiunnaarpata, Nuummit nuuttartut suli taama amerlatigiinnassapput. Taavalu Nuummi innuttaasut ikiliartulersinnaapput, Klaus Georg Hansen oqarpoq.
Nunatsinnilu innuttaasut ikiliartuinnassanngippata, suna suliassaanersoq nalunanngitsoq, ilisimatooq isumaqarpoq.

- Inuit namminneq kajuminnerminnik najukkaminniiginnartinniarlugit ilungersorluta pilerinarsaasariaqarpugut najoruminarsaasariaqarlutalu. Tamannalu inoqarfinnut aningeriinnaanngitsunut kisianni aamma inoqarfinnut mikinernut atuuppoq, Klaus Georg Hansen oqarpoq.

Akeqarpoq

Tamaliornissarli akeqassaaq, aningaasallu killeqarput. Taamaammat inoqarfiit qanoq najoruminarsarniarnerlugit, minnerunngitsumillu inoqarfiit sorliit najoruminarsarneqassanersut politikerit isumaliuutigisariaqarpaat

- Inoqarfinnimi tamani aningaasaliisoqarsinnaanngilaq, taamaammat politikkikkut pingaarnersiuisoqartariaqarpoq, Klaus Georg Hansen KNR-imut oqarpoq.