Politikerit Narsarsuarmi isumasioqatigiittussanngorput
Aappaagumut Aningaasaqarnermut Inatsit ukiariaq saqqummiunneqarmat taamalu Qaqortumi mittarfittaartoqartussanngortoq oqaatigineqarmat, Qaqortumi qummoroortarnerit erinarsuataarnerlu imaaginnavipput.
Naalakkersuisull naatsorsuutigaat, pissutsit pissusissamittut ingerlaannariarpata Qaqortumi mittarfissaq ukiumi 2025-mi naammassineqarsinnaajumaartoq.
Tamannali aamma Narsarsuup siunissaata qanoq pineqarumaarnissaanik apeqqutinik nassataqanngitsuunngilaq.
Qaqortumi mittarfiliortoqarnissaanik aalajangertoqarnera aamma isumaqarpoq Narsarsuup atuuffiata siunissami allatut ilusilersorneqartussanngorneranik, tassalu taannarpiaavoq maannakkorpiaq eqqartorneqartussanngortoq, Kommune Kujallermi borgmesteri Stine Egede KNR- mut oqarpoq.
AAMMA ATUARUK Kalaallit Airports Qaqortumi mittarfik pillugu: Aallarteqqissinnaanngorpugut
Jannuaarip qeqqata missaani isumasioqatigiinneq
- Pappilissat qimerluuataaraanni, Naalakkersuisut maanna siunniuppaat Qaqortumi mittarfik atulerpat Narsarsuup heliporteqarfittut atorneqalernissaa, Stine Egede oqarpoq.
Taamaattumillu maanna Kommune Kujalliup naalakkersuisut peqatiserai jannuaarip qeqqata missaani Narsarsuarmi, Narsarsuup siunissaa pillugu isumasioqatigiumallugit.
- Ulluni marlunni apeqqutaasinnaasut tamaasa qallussavagut, taanna erseqqissaavoq.
Suli ullut sorlerpiaanissaat aalajangiunneqanngikkallarpoq, Kommunelli pilersaarutai naapertorlugit jannuaarip 15-iani 16-ianilu weekendtimi, taassumaluunniit weekendtimi tullissaani tamatuma pinissaa ilimagineqarpoq.
- Neriuppugut peqataasinnaasut tamarmik peqataajumaartut, Stine Egede oqarpoq, nangipporlu:
- Narsarsuarmi najugallit qanoq kissaateqarnersut aamma paasiniagassatsinnut ilaavoq, borgmesteri oqarpoq.
