Politikerit meeqqanik atornerluisimasunut pineqaatissiissut sukannernerulersikkusukkaat
Inatsisartut meeqqanik kinguaassiuutitigut atornerluisimasup inissiisarfimmiinnerata sivitsorneqarnissaa akueraat.
Politikerit taamaliornikkut meeqqanik kinguaassiuutitigut atornerluisarneq pinerluuteqarnertut imaannaanngitsorujussuartut naleqartitatsinnillu innarliinertut akuerineqarsinnaanngilluinnartutut isigineqartoq takutikkusuppaat.
AAMMA ATUARUK Meeqqanik kinguaassiutaatigut atornerluinermik nalunaarutiginninnerit amerleriartut
Innuttaasullu inatsisinik illersorneqartutut misigisimanerat aamma nukittorsarneqassaaq.
- Meeqqat ataatsimik, marlunnik, qulinik ukiullit kinguuaassiutitigut nappaateqartut, ukiut tamaasa qulequttat atuartarpagut. Angerlarsimaffeqanngitsut 70 procentii kinguaassiutimikkut atornerlunneqarnikuusut misissuinerit aamma takutippaat.
Inatsisartut Inatsisinut Ataatsimiitialiaata allagaa naapertorlugu ataasiartamik pinerliisimasunut pineqaatissiissutit agguaqatigiisillugit ukiup aappaata affaata ukiullu marluk akornannik maanna sivisussuseqarput.
Sakkortuuliortoqarsimatillugu, assersuutigalugu pinerlisaq ukiukittuaraappat imaluunniit persuttaanertaqarluniluunniit pinngitsaaliinertaqarpat, pinerliinerluunniit sivisusimaqippat, pineqaatissiiniarneq sivitsorneqarsinnaavoq.
Najoqqutaq: Inatsisartuni Inatsisinut Ataatsimiititaliaq
- Pineqaatissiinerit sukannernerusunngortinnissaannut pinaveersaartitsinerillu pitsaanerulersinnissaannut suliniuteqartariaqarpugut, Suleqatigiisitsisunit Tillie Martinussen oqarpoq.
Naalakkersuisut qaffaaniaraluarput
Nunatsinni pinerluttulerinermi inatsisip allanngortinnissaanut Danmarkimi inatsiseqarnermut ministereqarfik kisimi iliuuseqartuusinnaaavoq. Taamaattumik Naalakkersuisut danskit oqartussaasui attavigisariaqassavaat.
Danskit inatsiseqarnermut miniseteriat Nick Hækkerup ukioq ataatsip matuma siorna attavigineqarpoq.
Naalakkersuisut kinguaassiutitigut atornerluisimasunut peqqarniitsumillu nakuusernersimasunut pineqaatissiisarneq ukiunik 16-inik taamani qaffanniaraluarpaat.
AAMMA ATUARUK Nukannguaq: Kinguaassiutitigut atornerluinerit pillugit qaammarsaasoqarnera ajunngilluinnarpoq
Naalakkersuisup akissutaa naapertorlugu nunatsinni inissiisarfinni sulisoqarneq inissallu unammillernarput.
Taamaattumik Naalakkersuisut siunnersuutaat piviusunngussappat pineqaatissinneqarsimasunut inissiisarfinnut aningaasat amerlanerusut atorneqartariaqarput sulisunillu amerlanerusunik ilinniartitsisoqartariaqarluni.
Utaqqisut amerlavallaat
Taamaaliortoqanngippammi pineqaatissinneqarnissamut utaqqisut amerlavallaalissapput.
Inatsisartulli meeqqanik atornerluisimasunut pineqaatissiisarneq, inissiisarfiit eqqartuussiveqarnerlu ilungersunartorsiortinnagit, sukannernerulersinneqarsinnaasoq naatsorsuutigaat.
- Inuit inatsisitigut illersorneqarnerisa qaffasinnerpaaffimminiinnissaa uagut maani inersuarmi qulakkeerinneqataaffigissavarput. Tamannami kia allap isumagissavaa uaguunngippat?, Inatsisinut Ataatsimiititaliami siulittaasup tullia Sofie Geisler (IA) oqarpoq.