Politikerit iliuusaat nittartakkami nutaami alaatsinaanneqassapput
Aviisi.gl nittartakkap nutaap adresseraa - Atuagagdliutinilu ullumi saqqummersuni allaatigineqarpoq, nittartagaq Nunatsinni politikerit iliuusaannik qulaajaavittut ingerlatsiviussasoq. Naalakkersuinermik suliallit ilassinninnermut kontomik atuinerat, angalanerni nerivallaarnerit imigassartorpallaarnerillu kiisalu politikerit inuiaqatigiinni inissisimanerminnik atornerluisarnerat eqqummaariffigineqassasut, nittartakkamik pilersitsup oqaatigaa.
Nittartakkamik Aviisi.gl-imik pilersitsisuuvoq, inatsisileritooq Lars Bo Bjørknæs. Taassuma Nunatsinni suliffeqarfinnit pisortanit ingerlanneqartunit paasissutissanik pissarsiniarneq pikkoriffigilluinnalersimavaa. Taassuma ilaatigut paasisai tunngavigalugit, ukiormanna siusinnerusukkut Atuagagdliutini politikerit ilassinninnermut aningaasaliissutinik atornerluisarneri qulaajarneqarput.
- Maannamut paasisat 400-t itisilerillunilu paasiniaanerit toqqortaatigaakka. Ullut tamaasa tusagassiat marluk nittartakkami saqqummiunneqartassapput, Lars Bo Bjørknæs Atuagagdliutinut ullumi saqqummersunut oqarpoq.
Lars Bo Bjørknæs 34-nik ukioqartoq Nunatsinni inatsisilerituutut sulisimavoq, ilaatigut Maniitsup Kommuniani, Namminersornerullutik Oqartussani kiisalu Atuisut siunnersuisoqatigiivisa allattoqarfianni.
