Politikerit akeqanngitsumik nerisinneqartarunnaarput

Inatsisartunut ilaasortat ulloqeqqanut unnukkullu akeqanngitsumik nerisinneqartarnerat atorunnaassasoq, Inatsisartut siulittaasoqarfiata aalajangerpaa.
Allattoq Louise M. Kleemann
oktobarip 08-at 2009 14:01

Aningaasartuutit sipaarutaasussat 300.000-400.000 koruunit akornanniinnissaat naatsorsuutigineqartoq, Atuagagdliutini allaaserineqarpoq.

Taamaatillutik Inatsisartunut ilaasortat ataatsimiinnerup nalaani namminneerlutik nerisassatik isumagisalissavaat.

Inatsisartunut ilaasortat siornatigut ulloqeqqanut ilaatigullu unnukkut akeqanngitsumik nerisinneqartaraluarput.

- Inatsisartuni ilaasortat 400 koruuninik ullormusiaqartinneqartarmata akeqanngitsumik nerisitsisarneq unitsinneqarpoq, Inatsisartut allattoqarfianni allatsit pisortaat, Kim Pagel oqarpoq.

Inatsisartunut ilaasortat akeqanngitsumik nerisaqaatigalutik ullormusiaqartinneqarnerat Inatsisartut Siulittaasuata, Josef Motzfeldtip kissaatigisimanngikkaa aamma allaaserineqarpoq.

Ataatsimiinnerni unillatsiarnernilu sutugassat aamma annikillisinneqarsimasut, Kim Pagel oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq