Politiken: Danmark Norgemiit ilinniartariaqaraluarpoq
Naalagaaffinnut issittumut sinerialinnut Norgemut, Ruslandimut kiisalu Canadamut, umiarsuakkut angallannermi, uuliasiornermi kiisalu takornariaqarnermi angallannikkut kiisalu sakkutooqarnikkut piorsaaruttulersunut sanilliullugu Danmark kinguussaavoq. Kunngeqarfiup nunanut allanut tunngatillugu politikkikkut unammilligassai Issitumiinnerat allaanngilaq Danmarkimi politikerit suli paasisimanngikkaat, aviisi Politiken allappoq.
Taanna isumaqarpoq aggustimi issittumi periusissaq pimoorussaanngitsoq pituttuisuunngitsorlu naalakkersuisuusimasut saqqummiussaat, naalakkersuisunngorlaat S-R-SF-meersut ingerlatiinnaraat.
Akerlianik Norgemiut nunanut allanut tunngasunut ministeriata aqqutissamik innersuussisoq, Politiken isumaqarpoq.
- Issittoq Norgemit pingaarnerpaanngortinneqarpoq, maannakkullu imarsiortutigut sakkutooqarnikkut soorlu aamma avatangiisitigut ajunaarnersuaqarnissaanullu upalungaarsimanissamut sillimaniarnissakkut piorsaanissamut aningaasalersuilluni aallartilluni. Silap pissusaata allanngoriartorneranut naleqqussarnissaq minnerunngitsumillu eqqissisimasumik aqqiissutissat pineqartillugit Ruslandimik akuutitsinermigut, nunanut allanut tunngasunut politikkeqarneq pitsaasoq malitassaasorlu, aviisi allappoq.
Kalaallit nunanilu avannarlerni politikerii peqatigalugit - imminut napatittumik aaqqiagiinnginnertaqanngitsumillu ineriartortitsinermi Danmark siuttuunissamut periarfissaqaraluarpoq. Tamannali naalakkersuisut S-R-SF-meersut siunnerfimminnik allanngortitsinissaanik piumasaqaateqarpoq, Issittumiinnertik annertusartariaqarpaat, sakkutuullu imarsiortut aalisarnermit nakkutilliinermiit imaatigut anaassiniarnermut piareersimanissaat annertusarlugu, Politiken allappoq.
