Politiit ujaasinertik unitsippaat
Inuit marluk umiatsiamiissimapput - angut 57-inik ukiulik taassumalu ernera 25-nik ukiulik. Aalisartut taakku Qasigiarmiuupput.
Politiit ajunaalernermik kalerrisaarummik pingasunngormat nalunaarutisereersullu, umiatsiap allap 57-inik ukiulik immami ipisimasoq naammattoorpaa, aamma umiatsiap usigisimasai soorlu qalerallit naammattoorpai.
Angut ipisimasoq uummarsarneqaraluarpoq, Qasigianngualiaanneqarlunilu, nakorsamillu toqusimasutut uppernarsarneqarluni.
Tamatuma kingorna politiit umiatsianik angallatinillu qulinik ikiorteqarlutik angutip ernera 25-nik ukiulik ujaarigaluarpaat, ujaasinerli paasisaqarfiunngitsumik ippassaq ualikkut sisamanut taamaatiinnarneqarluni.
Tamatuma kinguneranik Qasigiannguani politiit tamaani angalaartunut umiatsiap kivisup sinnikuinik, aalisarnermut atortuinik allanillu umiunermeersunik malussarniaqqullugit qinnuigineqarput.