Ujaasineq: Politiit ujaasinerat suli kinguneqanngitsoq
Jyllandip kangiani politiit KNR-imut taama ilisimatitsipput.
Pavia Hamann Kalaallit Nunaannit kingoqqisuuvoq, ujaarineqartorlu kingullermik arfininngornermi februaarip ulluisa qulinganni ullaassakkut nalunaaqutaq tallimanut qiteqquttoq tusarfigineqarpoq, angunni oqarasuaatikkut oqaluukkamiuk.
Pavia Hamannip angunni tassani oqaluttuuppaa narsaammiilluni, angutaatalu tusaasinnaavaa ernini nanertisimasoq. Taamaammat angutaa kingorna politiinut sianerpoq.
AAMMA ATUARUK Pavia suli nassaarineqanngilaq
Suliniaqatigiiffik Missing Peoplemeersut, illoqarfeeqqat Fausingip Auningillu eqqaanni arfininngormat februaarip ulluisa 16-ianni ujaaseqataagaluarput. Pavia Hamann tamaani kingullermik takuneqarpoq. Politiit suleqatiginerisigut ujaasisoqarpoq.
Pavia Hamannip oqarasuaataata angallattakkap attavia illoqarfeeqqat taakku marluk akornanneersoq politiinit ullaassakkut sumiissusersineqarsinnaasimagaluarpoq.
Politiit tamanna pillugu tamaani innuttaasut qinnuigaat saaffiginneqqullugit, angummik aqqusinikkut unnuaq taanna angalaartumik takunnissimassappata.
Maannamulli ujaasinerit kinguneqarsimanngitsut, Østjyllands Politip nalunaarutigaa.
Østjyllands Politip oqarasuaataasa normoraat +45 87 31 14 48
AAMMA ATUARUK Angut kalaaleq Jyllandip kangiani ujaarineqartoq