Angut kalaaleq Jyllandip kangiani ujaarineqartoq
Jyllandip kangiani politiit Aarhus Lokalavisen-imut taama ilisimatitsipput.
Pavia Henrik Anton Hamann kingullermik arfininngormat ullaassakkut nalunaaqutaq 04:30 tusarfigineqarpoq, angunni oqarasuaatikkut oqaluukkamiuk.
Fausingip kitaatungaani Virringmarkip eqqaanit, Djurslandimi Assentoftip Auningillu akornanniittumit angumminut sianerpoq.
Pavia Henrik Anton Hamannip angunni oqaluttuuppaa narsaammiilluni, angutaatalu tusaasinnaavaa ernini nanertisimasoq. Taamaammat angutaa politiinut sianerpoq.
Politiilli Pavia Henrik Anton Hamannimut tunngatillugu maannamut takussutissanik nassaarsinnaasimanngillat.
- Sapaatiummat ullaassakkulli digitalitigut uppernarsaatinik allanik peqanngilagut, taamaammat tunngaviatigut sumiissinnaavorluunniit, Jyllandip kangiata politiivineersoq, Janni Lundager, Aarhus Lokalavisenimut oqarpoq.
Politiit maqaasineqartoq sapaatiummat ualikkut unnukkullu ujarpaat. Qimmilerlunilu qulimiguulimmillu ujaasineq ataasinngornermi ullaakkut nanginneqarpoq.
Pisumut tunngatillugu paasissutissanik pigisaqartut Jyllandip avannaata politiivinut oqarasuaatikkut +45 114-kkut sianerfigineqarsinnaapput.
