Tasiilami innuttaasut politiit takussaanerunissaat kissaatigaat
Politiit Tasiilami takussaanerulernissaat.
Innuttaasunik oqaloqatigiinnertalimmik septembarip ulluisa 14-ianni ataatsimiititsinermi ilaatigut taanna kissaatigineqarpoq.
Kommuneqarfik Sermersooq nittartakkamini taama allappoq.
Politiit sianertoqartillugu orniguteriataarfissaqanngikkaangamik illoqarfimmi ualikkut nalunaaqutaq sisamat kingorna angalaarneq ajorput. Politiilli ualikkut unnuneranilu takussaanerulernissaat innuttaasunit kissaatigineqarpoq, tamanna toqqissisimanerulersitsisarmat.
Oqartussat illoqarfimmi imigassamik aalakoornartortalimmik sakkortuunik arlalinnik pisoqareernerani septembarip aallartilaarnerani tuniniaajunnaarsitsereersut innuttaasunik oqaloqatigiinnertalimmik ataatsimiisitsinerit aaqqissuunneqarput.
Tamatuma saniatigut nammineq kajumissutsiminnik aallartitsisoqartoq, kommuni allappoq.
AAMMA ATUARUK Tasiilaq: Imigassamik inerteqquteqarnerup atorunnaarnerata kingorna eqqissisimasoqartoq
Angajoqqaanut suleqatigiffeqarnissamut aallarnisaasoqaleruttorpoq, unnuarissallu tujuulussatik kavaajassatillu Danmarkimiit tikeriarpata angalaartalissapput. Aamma 18-nit 21-llu akornanni ukiulinnut sammisassaqarnerulernissaa kissaatigineqarpoq.
- Siunnersuutit tamaasa piviusunngortissinnaanngilagut, iliuuserisinnaasagulli sapinngisamik piaartumik sulissutigissavagut. Siunnersuutit marlussuit piviusunngortinniarlugit aallartereerpagut, Kommuneqarfik Sermersuumi Tasiilami immikkoortumi pisortaq Hjørdis Viberg oqarpoq nangillunilu:
- Suliaq assut pitsaasumik ingerlanneqarpoq. Illoqarfimmi pissutsit pitsaanerulernissaat innuttaasunit annertuumik kissaatigineqarpoq, ingerlariaqqinnissatsinnullu isumassarsiatsialappassuaqarpugut.
AAMMA ATUARUK Tasiilami innuttaasunik ataatsimiititsineq: Imigassarsisinnaaneq 21-nik ukiulinnut killilerneqarusuppoq
Oqaloqatigiinnertalimmik ataatsimiinnermi siullermi isumassarsiat suliniutillu pitsaasut pillugit oqariartuutit peqitaaranngorlugit Tasiilami inoqutigiinnut agguaanneqassapput, taakkulu suliarineqaleruttorput. Isumassarsiatsialaat soorunami ingerlateqqinneqassapput, soorluttaaq isumassarsianut nutaanut inissaqartitsisoqartoq. Tamanna pillugu timersortarfimmi oktobarip 19-ianni oqaloqatigiinnertalimmik kingumut ataatsimiititsisoqassaaq.
