Politiit: Tasiilami suliagut amerlanngitsuinnaapput
Kalaallit Nunaanni Politiit aningaasarsisoqarnerani akileraarutiniillu utertoortoqarnerani ulappupput.
Ullormili unnuamilu kingullermi ulapputit ikilipput.
Kalaallit Nunaani politiit pigaartuini pisortaq, Preben Kleist arfininngornermi taama oqaluttuarpoq.
- Ulappuppugut. Kisianni qujanartumik pisunut sakkortuunut ornigutinngilagut, taanna KNR-mut oqarpoq.
AAMMA ATUARUK Immikkoortortami pisortaq imigassamik inerteqquteqarneq pillugu: Tasillami unikaallannissaq pisariaqartipparput
Tasiilami ulluni kingullerni pisut sakkortuut pimmata eqqissiviilliortoqangaatsiarmallu, illoqarfik ukkatarineqarpoq. Aamma imigassamik aalakoornartulimmik tuniniaaneq ulluni 14-ini ippassamit matuneqarpoq.
Tamannalu iluaqutaasoq Preben Kleist oqarpoq.
- Tasiilami nunaqarfiinilu, ullumikkut tallimanngornermiit septembarip 17-iata tungaanut atuutilersumik, aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
- Tasiilami pisut alianartut amerlanngillat. Tamanna imigassamik aalakoornartulimmik tuniniaannginnermik peqquteqarsimassaaq, pigaartut pisortaat oqarpoq.
Angerlarsimaffimmi tuniniaaneq
Politiilli angerlarsimaffiit ilaanni aalakoornartumik tuniniaasoqarneraasunik inunnit nalunaarfigineqarsimapput.
- Pisut taakkua misissorluassuagut. Aalakoornartumik angerlarsimaffimmi tuniniaasut akiligassinneqartarput, imigassallu arsaarinnissutaasarlutik, Preben Kleist oqarpoq.
Nuna tamakkerlugu ullormi unnuamilu kingullermi imminut toqunniarlutik siorasaarisut qulit, angerlarsimaffimmi eqqissiviilliornerit tallimat, aqqusinermi perulluliornerit arfinillit, nakuuserneq imigassartorsimalluni bilernerit marluk nalunaarutigineqarput.